گرێبەستی پەرەپێدانی چوار کێڵگەی نەوتیی کەرکوک لە نێوان کۆمپانیای نەوتی باکوور و کۆمپانیایBPـی بەریتانی کارا کرا، کە ئامانج لێی زیادکردنی بەرهەمی نەوت و وەبەرهێنانی زیاترە لە گازی هاوەڵ.

وەزیری نەوت: هەنگاوێکی گرنگە بۆ پەرەپێدانی کێڵگەکان

لە رێوڕەسمێکدا بە چاودێریی حەییان عەبدولغەنی، وەزیری نەوتی عێراق، واژۆ لەسەر کاراکردنی گرێبەستەکە کرا. وەزیری نەوت رایگەیاند: "کاراکردنی گرێبەستەکە هەنگاوێکی گرنگە بە ئامانجی پەرەپێدانی کێڵگەکانی (ئاڤانا، جمبور، بای حەسەن و خەباز) و زیادکردنی بەرهەمی گاز بۆ دابینکردنی پێداویستیی وێستگەکانی کارەبا".

"بەرهەمی سەرەتایی 328 هەزار بەرمیل دەبێت"

وەزیری نەوت روونیکردەوە، چەسپاندنی بەرهەمی سەرەتایی بە 328 هەزار بەرمیلی رۆژانە، دەستپێکی گرێبەستەکەیە و هیوای خواست لە رێگەی پڕۆسەکانی پەرەپێدانەوە بەرهەمی نەوتی خاو و وەبەرهێنانی گازی هاوەڵ زیاد بکات.

کۆمپانیای BP: هەنگاوێکە بۆ بەهێزکردنی هاوبەشی

لایخۆیەوە، زەید یاسری، بەڕێوەبەری کۆمپانیای BP رایگەیاند، کاراکردنی گرێبەستەکە هەنگاوێکی سەرەکییە بۆ بەهێزکردنی هەماهەنگی و هاوبەشیی نێوان کۆمپانیاکەیان و کۆمپانیای نەوتی باکوور.

کۆمپانیای نەوتی باکوور: سوودێکی گەورەی بۆ پارێزگاکە دەبێت

هاوکات، عامر خەلیل، بەڕێوەبەری کۆمپانیای نەوتی باکوور رایگەیاند، کاراکردنی گرێبەستەکە دەستپێکی کارەکانە بۆ پەرەپێدانی کێڵگەکان و زیادکردنی بەرهەمی نەوت، کە "سوودێکی گەورەی بۆ پارێزگاکە دەبێت".

گرێبەستەکە نۆ ملیار بەرمیل نەوت لەخۆدەگرێت

گرێبەستی پەرەپێدانی چوار کێڵگەی نەوتیی کەرکوک لە 10ـی ئازاری 2025 واژۆکراوە و مەزەندە دەکرێت ئەو چوار کێڵگەیە نزیکەی نۆ ملیار بەرمیل نەوتی یەدەگیان تێدابێت کە شیاوی دەرهێنان بێت.