زانکۆی سلێمانی، رایگەیاند، بۆ جاری دووەم لەسەریەک، توانیویەتی پلەی یەکەم لەسەر ئاستی زانکۆکانی عێراق بەدەستبهێنێت، ئەمەش بەگوێرەی ریزبەندیی پێگەی بەناوبانگی "تایمز بۆ خوێندنی باڵا"ی بەریتانی.

راگەیاندنی دەستکەوتەکە

لە کۆنفڕانسێکی رۆژنامەوانی، پ.د. کۆسار محەمەد عەلی، سەرۆکی زانکۆی سلێمانی، بە فەرمی ئەم دەستکەوتەی راگەیاند و وتی: "زانکۆکەمان بەگوێرەی ریزبەندیی پێگەی تایمز بۆ خوێندنی باڵا، بۆ دووەم ساڵ لەسەر یەک پلەی یەکەمی لەسەر ئاستی عێراق بەدەستهێنا."

پێوەرەکانی هەڵسەنگاندن چی بوون؟

بەڕێوەبەری بەڕێوەبەرایەتیی رانکین لە زانکۆی سلێمانی روونیکردەوە، ئەم پلەبەندییە پشتی بە 18 پێوەری گشتگیری ئەکادیمی بەستووە کە لە پێنج بواری سەرەکیدا پۆلێن کراون:

• وانەوتنەوە و ژینگەی توێژینەوە

• کوالیتی توێژینەوە

• بە نێودەوڵەتی بوون

• پیشەسازی و هەماهەنگی لەگەڵ ژینگەی دەرەوە

• رێژەی دەرچووانی بەکالۆریۆس، ماستەر و دکتۆرا

بەڕێوەبەرایەتییەکە جەختی کردەوە، زانکۆی سلێمانی لەم پێوەرانەدا بەرەوپێشچوونێکی بەرچاوی بەدەستهێناوە.

پلانی داهاتوو: بەرەو سەربەخۆیی زانستی و ئیداری

سەرۆکی زانکۆی سلێمانی، ئاشکرای کرد، لە داهاتوویەکی نزیکدا پلانی ستراتیژیی پێنج ساڵەی زانکۆکە دەخەنەڕوو. لەمبارەیەوە وتی: "پرۆپۆزەڵێکیان پێشکەشی حکومەتی هەرێمی کوردستان کردووە بۆ ئەوەی زانکۆی سلێمانی زیاتر سەربەخۆ بێت لەڕووی زانستی و ئیداری، تاوەکو لە ئاستی نێودەوڵەتیدا زیاتر پێشبکەوێت." بەگوێرەى پرۆپۆزەڵەکە، زانکۆی سلێمانی کار بۆ ئەوە دەکات کە لەچەند ساڵی داهاتوودا خۆی مووچە و خەرجییەکانی دابین بکات.

زانکۆی سلێمانی، مێژوویەک لە پێشەنگی

زانکۆی سلێمانی کە لە ساڵی 1968 دامەزراوە، بە کۆنترین و یەکەمین زانکۆی کوردستان دادەنرێت و بەردەوامە لە تۆمارکردنی دەستکەوتی زانستی لەسەر ئاستی ناوخۆ و نێودەوڵەتی.