ڕوانگەی سووری بۆ مافەکانی مرۆڤ ئاشکرای دەکات، لە شەڕوپێکدادانەکانی گەڕەکە کوردییەکانی حەلەب، زیاتر لە 100 کەس کوژراون و پێشێلکاریی گەورەش بەرامبەر بە دیل و تەرمی ئەندامانى ئاسایش کراوە و ژمارەیەک هاوڵاتیی سڤیلیش بەشێوەیەکی مەیدانی گولـلەباران کراون.

ئەوەى لە سوەیدا کردیان لە حەلەبیش کردیان

ڕوانگەکە بڵاویکردووەتەوە، هاوشێوەی ئەو پێشلکارییە خوێناوی و تاوانانەی هێزەکانی حکومەتی کاتیی سووریا لە کەناراوەکان و سوەیدا کردوویانە، هەمان دیمەن و پێشێلکاری لە گەڕەکە کوردییەکانی حەلەبیش دووبارە بووەتەوە.

تەرمەکان دەسوتێندرێن

ڕوانگەی سووری دەڵێت، لە پێشێلکارییەکی ئاشکرای یاسا نێودەوڵەتییەکان، 15 تەرمى ئەندامانى هێزەکانی ئاسایش، کە چوار کەسیان ژن بوون، لە گەڕەکی شێخ مەقسوود سوتێنراون.

خەڵکى سڤیل گولـلە باران دەکرێن

ئاماژە بەوەشکراوە، کەسێکی سڤیل، پاش دەستگیرکردنی بەشێوەیەکی مەیدانى گولـلەباران کراون و لەلایەن هێزەکانی حکومەتی دیمەشقەوە سووکایەتی بە تەرمەکەشی کراوە.

فڕێدانى تەرمى ژنە شەڕڤان

بەگوێرەى ڕوانگەی سووری، یەکێکی دیکە لە پێشێلکارییەکانی گرووپە چەکدارەکان، فڕێدانە خوارەوەی تەرمی ژنە شەڕڤانێکە لە یەکێک لە باڵەخانەکانی گەڕەکی شێخ مەقسوودەوە.

ئامارى گشتى قوربانییان

ڕوانگەکە باسلەوەدەکات، کۆی گشتی کوژراوەکانی شەڕوپێکدادانەکانی چەند ڕۆژی حەلەب، گەیشتووەتە 105 کەس.

گەڕەکى شێخ مەقسوود پشکى شێرى قوربانى

ئاماژە بەوەش دەکات، 32 لە کوژراوەکان لە گەڕەکی شێخ مەقسوود بوون، کە شەش ژن و چوار منداڵیان تێدا بووە.

ڕوانگەی سووری: نۆ کەس بەشێوەیەکی مەیدانی گولـلەباران کراون

ڕوانگەکە دەشڵێت، نۆ کەسی دیکە لە نێویاندا دوو کارمەندی نەخۆشخانەی عوسمان لە ئەشرەفییە، بە مەیدانى لەلایەن گرووپە چەکدارەکانەوە گولـلەبارانکراون.

ئامارى کوژراوانى گرووپە چەکدارەکان

لەبارەى ئاماری کوژراوەکانی گرووپە چەکدارەکانی سەر بە حکومەتی دیمەشق، ڕوانگەی سووری باس لەوە دەکات، 39 کەسیان لێ کوژراوە.

دەستگیرکردنى کەسانى سڤیل

هەر بەگوێرەى ئەو ئامارانەی ڕوانگەی سووری بڵاویکردووەتەوە، لانیکەم 300 هاوڵاتیی سڤیلی شێخ مەقسوود لەلایەن گرووپە چەکدارەکانەوە دەستگیرکراون، سوکایەتییان پێکراوە.

میدیاى لایەنگیر

دەشڵێت، ئەو ڕاگەیاندنانەی پاڵپشتیی دەسەڵاتی سووریا دەکەن، بێدەنگییان لەو پێشێلکارییانە کردووە.