گوتەبێژی وەزارەتی دەرەوەی ئێران ڕایدەگەیەنێت، سەرەڕای هەڕەشەکانی ترەمپ بۆ وێرانکردنی وڵاتەکەیان، ئەوان مەیلیان بۆ کۆتاییهێنان بە جەنگ و وەرگرتنی قەرەبووی زیانەکان هەیە و لە ڕێگەی پاکستانەوە کار بۆ سەقامگیریی ناوچەکە دەکەن.

بەردەوامیی پەیوەندییەکان لەگەڵ ئەمریکا

ئەمڕۆ چوارشەممە، 15ـی نیسانی 2026، ئیسماعیل بەقایی، گوتەبێژی وەزارەتی دەرەوەی ئێران لە کۆنگرەیەکی ڕۆژنامەوانیدا ڕایگەیاند، سەرەڕای بوونی گرژییە توندەکان، پڕۆسەی ئاڵوگۆڕکردنی پەیام لە نێوان تاران و واشنتن تاوەکو ئێستاش بەردەوامە. بەقایی ئاماژەی بەوە کرد کە هەردوو وڵات لە ڕێگەی جیاوازەوە پەیامی یەکتریان پێدەگات و کەناڵە دیپلۆماسییەکان بە تەواوی دانەخراون.

وەڵامی هەڕەشەکانی دۆناڵد ترەمپ

سەبارەت بە لێدوانەکانی دۆناڵد ترەمپ، سەرۆکی ئەمریکا، گوتەبێژی وەزارەتی دەرەوەی ئێران باسی لەوە کرد کە ترەمپ بانگەشەی وێرانکردنی ئێران دەکات، بەڵام تاران ئامانجی لە هەر دانوستانێک ئەوەیە کە کۆتایی بە جەنگ و وێرانکارییەکان بهێنرێت. بەقایی جەختی کردەوە کە گەل و حکومەتی ئێران بۆ پاراستنی نیشتمانەکەیان ئامادەن و هەڕەشەکان نایانترسێنن.

ڕەتکردنەوەی هەبوونی چەکی ئەتۆمی و داوای قەرەبوو

لە بەشێکی دیکەی قسەکانیدا، ئیسماعیل بەقایی بە فەرمی دووپاتی کردەوە کە وڵاتەکەی خاوەنی چەکی ئەتۆمی نییە و بەرنامە ئەتۆمییەکەیان بۆ مەبەستی ئاشتیانەیە. هەروەها ئاشکرای کرد کە ئێران لە دانوستانەکاندا بە ڕەسمی داوای قەرەبووی هەموو ئەو زیانانەی کردووە کە بەهۆی جەنگەوە بەر ژێرخانی سەربازی و مەدەنیی وڵاتەکە کەوتوون.

ڕۆڵی پاکستان لە دانوستانە هەرێمییەکاندا

سەبارەت بە هەوڵە ناوچەییەکان، ئیسماعیل بەقایی ڕایگەیاند کە لە ئێستادا لەگەڵ وڵاتی پاکستان لە گفتوگۆی چڕدان بە مەبەستی ڕێکخستنی خولێکی نوێی دانوستانەکان. ئەم هەوڵە وەک بەشێک لە دیپلۆماسیی تاران بۆ بەهێزکردنی سەقامگیری و کەمکردنەوەی ئاڵۆزییەکان لە ناوچەی ڕۆژهەڵاتی ناوەڕاست و کەنداو دەبینرێت.