ئابووریی ئێران بەهۆی جەنگ و گەمارۆ نێودەوڵەتییەکانەوە ڕووبەڕووی داڕمانێکی گەورە بووەتەوە و هەناردە و هاوردەی ئەو وڵاتە بە ڕێژەی 90% پەکیکەوتووە.

هەڵکشانی ڕێژەی هەڵاوسان و دابەزینی بەهای تمەن

سندوقی نێودەوڵەتی دراو ئاشکرای کرد، ڕێژەی هەڵاوسان لە ئێران لە چارەکی یەکەمی ئەمساڵدا گەیشتووەتە 68.9%. ئەم بەرزبوونەوەیە لە کاتێکدایە کە بەهای تمەنی ئێرانی لە دوایین جەنگی نێوان تاران و واشنتۆن، نزمترین ئاستی بەرامبەر دۆلاری ئەمریکی تۆمار کردووە و فشارێکی زۆری خستووەتە سەر بژێوی هاوڵاتییان.

بەرزبوونەوەی نرخی خۆراک و دەرکردنی دراوی نوێ

بەپێی ئامارەکان، نرخی خۆراک تا مانگی شوباتی ڕابردوو بە ڕێژەی 105% و نرخی نان و دانەوێڵە بە ڕێژەی 140% بەرزبووەتەوە. ئەم دۆخە وایکردووە بانکەکانی ئێران گەورەترین دراو لە مێژووی خۆیاندا دەربکەن کە بەهای یەک ملیۆن تمەنە، تاوەکو بتوانن لەو ڕێگەیەوە خواستی نەختینەیی لە وڵاتەکەدا پڕ بکەنەوە.

پەککەوتنی 90%ـی بازرگانیی دەرەکی

دەزگای ئۆکسفۆرد ئیکۆنۆمیکس بڵاویکردەوە، گەمارۆدانی گەرووی هوورمز لەلایەن ئەمریکاوە و داخستنی گەرووەکە لەلایەن ئێرانەوە، بووەتە هۆی لەدەستدانی 90%ـی بازرگانیی دەرەکیی ئەو وڵاتە. ئەم پەککەوتنە داهاتی هەناردەکردنی ئێرانی بە ڕێژەی 70% کەمکردووەتەوە و زیانی گەورەی بە ژێرخانی دارایی تاران گەیاندووە.

ئاسۆیەکی نادیار بۆ ئاگربەستی نێوان تاران و واشنتۆن

ئەم قەیرانە ئابوورییە پاش تێپەڕبوونی نزیکەی 40 ڕۆژ بەسەر جەنگی هاوبەشی ئەمریکا و ئیسرائیل دژی ئێران دێت. سەرەڕای ئەوەی ئاگربەستی نێوان هەردوو وڵات لە 8ـی نیسانی 2026ـەوە دەستی پێکردووە، بەڵام تاوەکو ئێستا وادەکەی بە نادیاری ماوەتەوە و دیار نییە کە هەردوولا دەگەنە ڕێککەوتنی کۆتایی یان گرژییە سەربازییەکان دووبارە دەستپێدەکەنەوە.