بەشێک لە هاونیشتمانییان وا دادەنێن هەر کە ئازاری تەنیشتەکان (کەلەکە) یان هەبوو ئەوا گرفتێکی تەندروستیی گورچیلەیان هەیە، د.محەممەد عەبدولکازم، پزیشکی پسپۆڕی نەخۆشییەکانی گورچیلە و میزەڕۆ و نەزۆکی پیاوان، لە چەند ڕێنماییەکدا ئەم بابەتە ڕوون دەکاتەوە.

هۆکارەکانی بوونی ئازاری تەنیشت(کەلەکە)

پزیشکە پسپۆڕەکە دەڵێت " بەردی گورچیلە هەمیشە ئازاری تەنیشت (کەلەکە) دروست دەکات، بەڵام بەڵام چەندین هۆکاری دیکە هەن دەبنەهۆی ئازاری تەنیشت''، لەوانە:

1. گرژبوونی ماسولکە
2. کێشەکانی بڕبڕەی پشت
3. هەوکردنی کۆئەندامی میزەڕۆ
4. هەوکردنی گورچیلە

چۆن بزانین ئازاری تەنیشت(کەلەکە) بەهۆی بوونی بەردی گورچیلەوەیە؟

پزیشکەکە دەڵێت " ئازاری بەردی گورچیلە زۆرجار زۆر توندە، وەک شەپۆل دێت و دەڕوات و لەوانەیە لە تەنیشتەکانەوە بەرەو ناوچەی ڕان و بنکڕک شۆڕ ببێتەوە، دەکرێت لەگەڵ دڵتێکەڵهاتن، ئارەقکردنەوە، و بێ تاقەتیدا سەرهەڵبدات" .

هەوکردن لە چ کاتێکدا دەبێتەهۆی دروستبوونی ئازاری لاتەنیشت(کەلەکە)؟

د.محەمەد دەڵێت " دەکرێت ئازاری پەیوەست بەهەوکردن لەگەڵ تا، لەرز  و چەند نیشانەیەکی دیکەدا بێت''.

ئازاری ماسولکە لە چ کاتێکدا دەبێتەهۆی دروستبوونی ئازاری تەنیشت(کەلەکە)؟

پزیشکەکە دەڵێت " ئازاری ماسولکە زۆرجار بە جووڵە یان فشار خراپتر دەبێت".

" نابێت ئازار پشتگوێ بخرێت"

پزیشکەکە دەڵێت '' خاڵی گرنگ لە ئەم حاڵەتەدا تێگەیشتنە لە ئازارەکە و شێوازی  سەرهەڵدان و بەدواداچوونی، ئەگەر ئازارەکە توند و بەردەوام بوو، یان لەگەڵ تا و ڕشانەوەدا بوو، پێویستی بە سەردانی پزیشکی پسپۆڕ و هەڵسەنگاندنی بەپەلە هەیە".