ڕوانگەی سووری بۆ مافەکانی مرۆڤ ئاشکرای دەکات، حکومەتی ڕاگوزەری سووریا هەڵمەتێکی دەستگیرکردنی هاونیشمانیی کوردی لە ڕەققە و سنووری دیمەشق دەستپێکردووە، بەمەبەستی بەکارهێنانیان لە پڕۆسەی ئاڵوگۆڕکردن لەگەڵ چەکدارە دەستگیرکراوەکانیان لای هەسەدە.

تۆمارکردنی دەستگیرکردنی 40 هاونیشتمانیی کورد

ڕوانگەکە ئاماژەی بەوەکردووە، لە مانگی ڕابردوودا دەستگیرکردنی زیاتر لە 40 هاونیشمانیی کوردیان تۆمارکردووە، لەو دەستگیرکراوانە ناوی 15 کەسیان لە لیستی ئەو کەسانەدا بوون، ڕۆژی هەینی ڕابردوو حکومەتی سووریا لە پڕۆسەی ئاڵوگۆڕی دەستگیرکراوەکاندا ئازادی کردن.

ئامانج لێی خۆدزینەوەیە لە ئازادکردنی شەڕڤانەکانی هەسەدە

بەگوتەی ڕوانگەی سووری بۆ مافەکانی مرۆڤ، ئامانجی حکومەتی دیمەشق، خۆدزینەوەیە لە ئازادکردنی شەڕڤانە ڕاستەقینەکانی هەسەدە، ئەمەش پێچەوانەی خاڵەکانی ڕێککەوتنە واژۆکراوەکانە لەگەڵ هەسەدە.

دیاترین ئەو گرتووخانانەی شەڕەڤانیان تێدا زیندانیکراوە

بە گوتەی ئەو چەکدارانەی پێشتر ئازادکراون، گرتووخانەکانی حەلەب، حەما، حومس، دێرەزوور، گرێ سپی و ڕەققە ژمارەیەکی زۆر لە شەڕڤانانی هەسەدەیان تیادایە.

زانیاری لەسەر شەڕەڤانە زیندانییەکان

یەکێک لەو شەڕڤانانەی ڕۆژی هەینی ئازادکراوە ڕایگەیاند، لە گرتووخانەی پۆلیسی سەربازیی حەلەب، زیاتر لە 150 شەڕڤانی دەستگیرکراوی تیادایە.

ژمارەی شەڕەڤانە دەستگیرکراوەکان

ڕوانگەی سووری جەخت لەوە دەکاتەوە، بەگوێرەى ئەو داتایەی بە دەستیان گەیشتووە، زیاتر لە 500 شەڕڤانی هەسەدە لە گرتووخانەکانی سووریادان، ئەمەش ئەوە دەردەخات، حکومەتی سووریا هاوڵاتیی سڤیل بەکاردەهێنێت بۆ ئاڵوگۆڕکردن.