کەی ڕژێنی دەرەقی( پەریزاد) پێویستە بە نەشتەرگەری لاببرێت؟

ڕژێنی دەرەقی( پەریزاد) یەکێکە لە گرنگترین ڕژێنەکانی جەستە، بەڵام هەندێک جار تووشی کێشەیەک دەبێت کە تەنها بە دەرمان چارەسەر ناکرێت.

لەئەم بارودۆخانەدا، نەشتەرگەریی لابردنی ڕژێنی دەرەقی(پەریزاد) دەبێتە بڕیاری کۆتایی:

گومان لە بوونی شێرپەنجەی ڕژێنی دەرەقی(پەریزاد): ئەگەر لە ڕێگەی پشکنینی شانەزانی یان پشکنینی سۆنەرەوە دەرکەوت کە گرێکە گومانی شێرپەنجەی لێ دەکرێت، پێویستە بە زووترین کات لاببرێت
گەورەبوونی لەڕادەبەدەری گرێکە: کاتێک ڕژێنە دەرەقییەکە فشار دەخاتە سەر بۆری هەناسە یان سورێنچک و دەبێتەهۆی توندیی هەناسە و ناڕەحەتی لە کاتی قووتدانی خواردندا
ڕژێنی دەرەقیی(پەریزاد)ـی ژەهراو: کاتێک ڕژێنەکە بڕێکی زۆری ئاستی هۆرمۆن دەردەدات و بە دەرمان یان یۆدی تیشکدەر کۆنتڕۆڵ ناکرێت
بوونی گرێی فرەجۆر: کاتێک چەندین گرێ لەناو ڕژێنی دەرەقی(پەریزاد) دا دروست دەبن و بە تێپەڕبوونی کات قەبارەیان زیاد دەکات
کێشەی جوانکاری: هەندێکجار بەهۆی گەورەیی ڕژێنی دەرەقی(پەریزاد) ـەوە شێوەی مل تێکدەچێت و چارەخوازەکە بە مەبەستی ڕێکخستنەوەی شێوەی ملی داوای لابردنی گرێکە دەکات

جۆری نەشتەرگەریی لابردنی گرێی ڕژێنی دەرەقی(پەریزاد) چییە؟

نەشتەرگەرییەکە یان بە لابردنی "نیوەی ڕژێنی دەرەقییەکە " یان "هەموو ڕژێنەکە" دەبێت. خۆشبەختانە ئێستا ئەم نەشتەرگەرییانە بە شێوازێکی پێشکەوتوو، وردییەکی زۆر و بە کەمترین بڕین لە شوێنی نەشتەرگەرییەکە ئەنجام دەدرێن.

ڕێنمایی بۆ ئەو چارەخوازانەی گرێیان هەیە لە ملیاندا

ئەگەر کەسەکە هەستی بە بوونی بە گرێ یان گۆڕانکاری لە قەبارەی ملیدا کرد، پشتگوێی نەخات و پشکنین ئەنجام بدات، چونکە تەندروستیی کەسەکە پێش هەموو شتێکە.

د. دیاری نیهاد ئیسماعیل: پزیشکی پسپۆڕی نەشتەرگەریی گشتی