موقتەدا سەدر، ڕێبەری ڕەوتى نیشتمانیی شیعە، وەڵامی باڵیۆزی بەریتانیای لە عێراق دایەوە و داوادەکات، بەعسییەکانى نیشتەجێی بەریتانیا ڕادەستى عێراق بکەنەوە.

"ئێمە لەوان نین"

سەدر لە پەیامێکدا وەڵامی باڵیۆزی بەریتانیای لە عێراق دایەوە کە گوتبووى، بەریتانیا دەسەڵاتی لە عێراق ڕادەستی پێکهاتەی شیعە کردووە. سەدر دەڵێت، "ئەگەر دەستەیەک لە شیعە لەبەردەم ئێوەدا کڕنۆشیان بردبێت، ئەوا ئێمە لەوان نین".

"بەریتانیا بەرپرسیارە لە هێنانی ڕژێمی پیشوو"

هەروەها بەریتانیای تۆمەتبار کرد بەوەی لە پشتگیری و هێنانی ڕژێمی پێشووی عێراق بەپرسیار بووە و ڕەخنەشی لەوە گرت کە ئێستا منەت بەسەر گەلی عێراقدا دەکەن.

هەندێک هێز لە مانەوەی ڕژێمی پێشوو سوودمەندبوون

ڕێبەری ڕەوتى نیشتمانیی شیعە ئاماژەی بەوەش کردووە، ئەگەر قوربانیدانی بنەماڵەی سەدر و لایەنگرانیان و دژایەتیکردنیان لە ناوخۆی عێراقدا نەبووایە، کۆمەڵگەی نێودەوڵەتی نەیدەزانی کە ڕژێمی پێشوو لەلایەن گەلەوە ڕەتکراوەتەوە، لە کاتێکدا کە هەندێک لە هێزەکانی ئۆپۆزسیۆنی دەرەوە سوودمەند بوون لە مانەوەی ئەو ڕژێمە.

"لەندەن حەشارگەی سەرەکیی بەعسییەکان و دوژمنانی عێراقە"

سەدر لەندەنی بە حەشارگەی سەرەکی بەعسییەکان و دوژمنانی عێراق ناوبردووە و داواش لە حکومەتی بەریتانیا دەکات، سەرجەم ئەو کەسانە ڕادەستی دادگای عێراق بکاتەوە، کە لەو شارە نیشتەجێن.

بەگوێرەى یاساکانی بەریتانیا ڕەتکراونەتەوە

باسی لەوەشکردووە، لێدوانەکانی باڵیۆزى بەریتانیا لە عێراق هیچ پەیوەندییەکی بە ئازادی ڕادەربڕینەوە نییە، بەڵکو هێرشە بۆسەر پیرۆزییەکان و نیشتمان، کە بەگوێرەى یاساکانی بەریتانیاش ڕەتکراوەتەوە.

فشاریان نەکردووە بۆ داوای لێبوردن

موقتەدا سەدر ئاماژەی بەوەشکردووە، بەهۆی هەڵوێستەکانی ئێستای بەریتانیا لە دژی بەشێک لە سیاسەتە نێودەوڵەتییەکان، نەیانویستووە فشار بکەن بۆ داوای لێبوردنی فەرمی دیپلۆماسی لەسەر لێدوانەکانی باڵیۆزەکەیان لە عێراق.