لەگەڵ هاتنی وەرزی گەرما، هاونیشمانییان زیاتر ڕوو لە ڕووبار و مەلەوانگەکان دەکەن و کاتێکی خۆش بەسەردەبەن، بەشێکیشیان وەکو وەرزشێک بە بەردەوامی مەلە دەکەن، بەڵام گرنگە لەکاتی مەلەکردندا ڕێنماییە تەندروستییەکانیشمان لە بیربێت.

ڕێنامەکانی تەندروستی بۆ مەلەکردن

پێش مەلەکردن

• هەرگیز بە تەنیا مەلە مەکە
• پێش مەلەکردن جەستەت گەرم بکە و کەمێک کشان بە ماسولکەکانت بکە
• لە پاش خواردنی ژەمێکی قورس یان کحول، بە هیچ جۆرێک ڕاستەوخۆ مەلە مەکە
• زووزوو ئاو بخۆرەوە چونکە تەنانەت لەکاتی مەلەکردنیشدا جەستە ئەگەری وشکبوونەوەی هەیە
• ئەگەر لە دەرەوە مەلەت کرد، دژەخۆر بەکاربهێنە
• چاویلکە و جلوبەرگی تایبەت بە مەلەکردن بەکاربهێنە
• ئەگەر لە دەرەوە مەلەت کرد، نابێت ئاوەکە ڕەنگی گۆڕابێت بۆ زەرد یان سەوز، هەروەها نابێت بۆنی هەبێت
• پێش خۆهەڵدان بۆناو ئاوەکە گرنگە قوڵیی شوێنەکە بزانیت

پاکوخاوێنی

• پێش مەلەکردن خۆت بشۆ
• ئەگەر سکچوون، ڕشانەوە، هەوکردنی گوازراوەی پێست یان برینت هەیە مەلە مەکە
• ئاوی ناو مەلەوانگە قوت مەدە
• لەپاش مەلەکردن گوێیەکانت وشک بکەرەوە
• لە پاش مەلەکردن ڕاستەوخۆ جلەکانی مەلەکردن لاببە و خۆت بشۆ

تەندروستییت بپارێزە

• ئەگەر هەستت بە سەرگێژخواردن، هەناسەتوندی، سنگئێشە و ئازاری توندی ماسولکە کرد، لە مەلەکردن بوەستە
• ئەگەر ڕەبۆت هەیە، پەمپی ڕەبۆکەت با لێت نزیک بێت
• تووشبووانی شەکرە پێویستە پێش و پاش مەلەکردن پشکنینی شەکرە بکەن، چونکە هەندێجار مەلەکردنی زۆر هۆکارە بۆ دابەزینی شەکرە و دەکرێت مەترسیدار بێت
• کلۆر بۆ چاو و پێست خراپە، هەر بۆیە گرنگە پاش مەلەکردن خۆت بشۆیت و شێدارکەرەوە بەکاربهێنیت

ئەگەر لە پاش مەلەکردن تووشی ئەم حاڵەتانە بوویت، سەردانی نەخۆشخانە بکە:

• ئازاری بەردەوامی گوێ
• پەڵەی پێست
• بەرزبوونەوەی پلەی گەرمیی جەستە پاش مەلەکردن
• هەناسەتوندی
• بێهێزیی زۆر و تێکچوونی هۆشداری
• شینبوونەوەی لێو یان کۆکەی زۆر و توند