ڕاوێژکارێکی موجتەبا خامنەیی ڕایگەیاند، ئەو ڕەشنووسەی لە نێوان ئەمریکا و ئێران بۆ کۆتاییهاتنی جەنگ گفتوگۆی لەبارەوە دەکرێت، نێوەڕۆکەکەی ناڕوونە.

فشارەکانى ترەمپ

موحسین ڕەزایی، ڕاوێژکاری ڕێبەری ئێران ڕایگەیاند، "ترەمپ هەوڵدەدات فشارمان لێبکات بۆ قبوڵکردنی مەرجەکان، لە بەرامبەریشدا مەرجەکانی ئێران بە ناڕوونی بهێڵێتەوە".

ڕەشنووسى ڕێککەوتنەکە ناڕوونە

ڕاوێژکارەکەی ڕێبەری ئێران دەشڵێت، "ئەو ڕەشنووسەی ئێستا گفتوگۆی لە بارەوە دەکرێت بۆ کۆتاییپێهێنانی جەنگی نێوان ئێران و ئەمریکا، پێویستی بە ڕوونکردنەوە هەیە".

کۆتایی جەنگەکان بەدەستى ترەمپ

ئەم قسانەی ڕەزایی لە کاتێکدایە، ترەمپ ڕایگەیاند، کۆتایی بە هەشت جەنگ هێناوە، نزیکیشە لەوەی کۆتایی بە جەنگی نۆیەم بهێنێت.

پێشێلکردنى ئاگربەست

ڕۆژنامەی وۆل ستریت جۆڕناڵ، پێشتر ئاشکرای کردبوو، ترەمپ بە یاریدەدەرەکانی گوتووە، "چاو بە ڕێککەوتنی ئاگربەستدا دەخشێنێتەوە، ئەگەر بەهۆی هێرشەکانی ئێرانەوە سەربازانی وڵاتەکەی بکوژرێن".

فشارەکان بۆسەر ئیدارەى ئەمریکا

هێرش و بۆردوومانە دووبارەکانی نێوان ئەمریکا و ئێران، بە گوتەی بەرپرسان، فشارەکانی سەر ئیدارەی ئەمریکایان زیاتر کردووە، سەبارەت بە توانای بەردەوامبوونی ئاگربەست لە ماوەکانی داهاتوودا.