گرانبوونی نرخی بەنزینی بازرگانی لە هەولێر و دهۆک، شۆفێرانی ناچار کردووە ڕوو لە بەنزینە 750 دینارییەکەی حکومەت بکەن و بۆ ماوەی چەندین کاتژمێر لە نۆرەدا چاوەڕێ بکەن.
لە شارەکانی هەولێر و دهۆک، نرخی یەک لیتر بەنزینی نۆرماڵی بازرگانی ئاستی 1,000 دیناری تێپەڕاندووە. ئەم بەرزبوونەوەیە وایکردووە شۆفێران توانای کڕینی بەنزینی بازاڕیان نەمێنێت و فشارێکی زۆر بکەوێتە سەر ئەو وێستگانەی کە بەنزینی پاڵپشتیکراوی حکومی بە 750 دینار دابەش دەکەن.
بەهۆی جیاوازیی نرخەکەوە، لەبەردەم وێستگە حکومییەکان نۆرەیەکی دوورودرێژی ئۆتۆمبێل دروستبووە. شۆفێرێکی تاکسی لە دهۆک ڕایگەیاند، ڕۆژانە زیاتر لە 3 کاتژمێر لە نۆرەدا دەمێنێتەوە بۆ ئەوەی بڕێک بەنزین وەربگرێت، ئەمەش کاتێکی زۆری لێ دەکوژێت و داوا دەکات نۆرەی ئۆتۆمبێلی گشتی و تایبەت لەیەکتر جیابکرێنەوە بۆ ئەوەی کارەکانیان پەک نەکەوێت.
شۆفێران ئاماژە بەوە دەکەن کە گرانبوونی سووتەمەنی کاریگەریی ڕاستەوخۆی لەسەر ژیان و بژێوییان دروست کردووە. یەکێک لە شۆفێرەکان باس لەوە دەکات کە پێشتر کاتێک بەنزین لە دەرەوە هاوردە دەکرا، نرخەکەی هەرزانتر و جێگیرتر بوو، بەڵام ئێستا کە پشت بە بەرهەمی پاڵاوگە ناوخۆییەکان دەبەسترێت، نرخەکان بەرزبوونەتەوە و بووەتە بارگرانییەکی گەورە بۆیان.
