
سبەى چوارشەممە، شاندێکى هونەرى لە هەرێمى کوردستانەوە دەچێتە بەغداد، شاندەکە لەگەڵ هاوتاکانیان لە حکومەتى فیدراڵ ڕەشنووسى ڕێککەوتنى کۆتایی لەسەر سیستمى ئەسیکۆدا ئامادە دەکەن و دواتر شاندى باڵا دەچنە بەغداد و ڕێککەوتنەکە واژۆ دەکەن.
بەگوێرەى زانیارییەکانى کەناڵ8، ئەو شاندە هونەرییەى دەچنە بەغداد، لەگەڵ بەرپرسانى دەستەى دەروازە سنوورییەکان و ژمارەیەک فەرمانگەى پەیوەندیدار کۆدەبنەوە، ئامانجى شاندەکە ئەوەیە، ڕەشنووسى ڕێککەوتنى کۆتایی ئامادەبکەن و دواتر شاندى باڵاى هەرێمى کوردستان لەگەڵ ئەنجوومەنى ئابوورى کۆدەبنەوە، کۆنووسى داخڵبوونى هەرێمى کوردستان لەسیستمى ئەسیکۆدا واژۆ دەکرێت.
هەر بەگوێرەى زانیارییەکان، لەپاش واژۆکردنى ڕێککەوتنەکە، کۆمپانیاکانى هەرێمى کوردستان دەچنە ناو سیستمى ئەسیکۆداوە و هاوشێوەى هاوتاکانیان لەناوچەکانى دیکە، سوودمەند دەبن لە خزمەتگوزارییەکانى.
جگە لە سیستمى ئەسیکۆدا، شاندەکە باس لە یەکخستنى پێناسى گومرگى دەکات و بەشێک لە ڕێککەوتنەکە لەسەر یەکخستنى پێناسى گومرگییە و لەدواى واژۆکردنى دەروازە سنوورییەکانى عێراق و هەرێمى کوردستان بەیەک سیستم، گومرگى کاڵا و پێداویستییەکان دەکەن.
جێبەجێکردنى سیستمى ئەسیکۆدا لەهەرێمى کوردستان یەکێکە لە خاڵە ناکۆکەکانى نێوان حکومەتى فیدراڵ و حکومەتى هەرێمى کوردستان، لەسەرەتاى ئەمساڵەوە سیستمەکە لە دەروازە سنوورییەکانى حکومەتى فیدراڵ لەگەڵ وڵاتانى دراوسێ جێبەجێ کراوە.
