بە سەرپەرشتی عەلی زەیدی، سەرۆکوەزیرانی عێراق، ئاڵوگۆڕی پۆستی پارێزگاری بانکی ناوەندیی عێراق کرا.

نزار حەسەن پارێزگاری نوێی بانکی ناوەندی

لە ڕێوڕەسمەکەدا کە ئەمڕۆ یەکشەممە بەڕێوەچوو، نزار ناسڕ حەسەن، وەک پارێزگاری نوێی بانکی ناوەندی پۆستەکەی وەرگرت و جێگەى عەلی عەلاقى گرتەوە.

عەلى زەیدی، جەختی لە گرنگیی "بەردەوامبوونی پڕۆگرامی چاکسازیی بانکی" کردەوە، کە دەبێتە "هۆکاری بەدیهاتنی سەقامگیریی دارایی و فەراهەمکردنی ژینگەی ئابووری و وەبەرهێنانی گونجاو بۆ گەشەپێدان".

سەرۆکوەزیرانی عێراق داوا دەکات پەرە بە دیجیتاڵکردنی بانکەکان بدرێت، کە جیهان پەیڕەوی دەکات لە جێبەجێکردنی پێوەرە نێودەوڵەتییەکان لە سیاسەتی دارایی.

ستایشی هەوڵەکانی عەلی عەلاق

زەیدی، ستایشی ڕۆڵ و هەوڵەکانی عەلی عەلاق، پارێزگاری پێشووی بانکی ناوەندی کرد و ڕایسپارد وەک ڕاوێژکاری سەرۆکوەزیران بۆ کارووباری ئابووری دەستبەکار بێت.

گۆڕانکارییەکانی چەند ڕۆژی ڕابردووی پۆستە باڵاکان

چەند ڕۆژێکە عەلی زەیدی دەستى بە گۆڕانکارى لە ژمارەیەک پۆستى باڵادا کردووە و دوێنێ گۆڕانکارى لە پۆستى ڕاوێژکارى ئاسایشى نەتەوەیى عێراقدا کرد.