ئەنجوومەنى وەزیرانى هەرێمى کوردستان پشتیوانیى خۆى بۆ لێکتێگەیشتنى هەولێر و بەغداد لەبارەى سیستمى ئەسیکۆدا دووپاتکردەوە و ڕایگەیاند، هەفتەى داهاتوو شاندێکى باڵا لەسەر ئەو پرسە دەنێرێتە بەغداد و هەر لە کۆبوونەوەکە بڕیاردرا کەمترین مووچەى خانەنشینى کرێکار بکرێتە 500 هەزار دینار.

ئامادەسازیی بۆ پەسەندکردنی کۆبوونەوەی ئەنجوومەنی وزاریی بۆ ئابووری

ئەنجوومەنی وەزیرانی هەرێمی کوردستان لە کۆبوونەوەی ئەمڕۆیدا (چوارشەممە 24ـی حوزەیرانی 2026)، لەبارەى لێکتێگەیشتنى هەولێر و بەغداد لەبارەى سیستمى ئەسیکۆدا، ئاشکرایکرد، وێڕای پشتیوانی لە کۆنووسی کۆبوونەوەی هاوبەشی هەردوو دەستەی گومرگی فیدڕاڵ و هەرێم، لە هەمان کاتدا وەزارەت و فەرمانگەکانى ڕاسپاردووە، بۆ هەماهەنگى لەگەڵ هاوتاکانیان لە حکومەتی فیدراڵ بۆ ئامادەسازیی پەسەندکردنی کۆتایی لە کۆبوونەوەی ئەنجومەنی وزاریی بۆ ئابووری و بڕیاریشیدا هەفتەی داهاتوو شاندێکی باڵای هەرێمی کوردستان بۆ ئەم مەبەستە سەردانی بەغداد بکات.

بەخێرایی پەسەندکردنی لێکتێگەیشتنەکە

ئەنجوومەنى وەزیران داوا لە حکومەتى فیدراڵ دەکات بەخێرایی ئەم لێکتێگەیشتنە پەسەند بکرێت و دەڵێت، ڕۆڵى بەرچاوى دەبێت لە زیادکردنى داهات و ڕێکخستنەوەى دامەزراوەکان لە چوارچێوەى دەستووردا.

تاوتوێی دەستبەری کۆمەڵایەتی

بڕگەیەکى دیکەى کۆبوونەوەى ئەنجوومەنى وەزیران تایبەت بووە بە دەستەبەریی کۆمەڵایەتیى کرێکاران، وەزیرى کاروبارى کۆمەڵایەتى ڕایگەیاندووە، ژمارەى ئەو پرۆژانەى دەستەبەر کراون گەیشتوونەتە 64 هەزار پرۆژە و ژمارەى کرێکارانى دەستەبەرکراویش گەیشتوونەتە 320 هەزار کرێکار.

لەکۆبوونەوەکەدا وەزیرى کار و کاروبارى کۆمەڵایەتى داوایکردووە، کەمترین مووچەى خانەنشینیى کرێکار بکرێتە 500 هەزار دینار و بەکۆى دەنگ داواکە پەسەند کراوە.