هەڵمەتی "بەرەبەیان" بۆ ڕاوکردنی تێوەگلاوان لە دۆسیەکانی گەندەڵی لە عێراق بەردەوامە و تاوەکو ئێستا سەدان ملیار دینار و دەیان موڵک لە ناوخۆ و دەرەوەی وڵات دەستیان بەسەردا گیراوە.

ئامارە گشتییەکانی هەڵمەتی "بەرەبەیان"

بەگوێرەی داتاکانی ئەنجوومەنی باڵای دادوەری و فەرماندەیی ئۆپراسیۆنە هاوبەشەکان، تاوەکو ئێستا بڕی 219,000,000,000 دیناری عێراقی و 85,000,000 دۆلاری ئەمریکی بەشێوەی کاش دەستی بەسەرداگیراوە. جگە لەوەش، دەیان موڵکی بازرگانی و نیشتەجێبوون، دەیان ئۆتۆمبێلی گرانبەها و بڕێکی زۆر لە زێڕ و خشڵ لە حەشارگەی بەرپرساندا دۆزراونەتەوە.

سەروەت و سامانی عەدنان جومەیلی و عەلی مەعارج

عەدنان جومەیلی، بریکاری پێشووی وەزارەتی نەوت بۆ کاروباری پاڵاوتن، زۆرترین بڕی پارەی لێ وەرگیراوەتەوە کە پێکهاتووە لە 98,000,000,000 دینار، 11,000,000 دۆلار، 70 موڵک، 21 ئۆتۆمبێلی مۆدێل نوێ و 3 کیلۆگرام زێڕ. هاوکات عەلی مەعارج، بریکاری وەزارەتی نەوت بۆ کاروباری دابەشکردن، دەست بەسەر 11,000,000 دۆلار، 4,000,000,000 دینار، 3 ئۆتۆمبێلی گرانبەها و بڕێکی زۆر زێڕیدا گیراوە.

دۆسیەی عالیە نسەیف و عەلا سەمیر جبووری

لە چوارچێوەی هەڵمەتەکەدا، دەست بەسەر سامانی عالیە نسەیف، ئەندامی ئەنجوومەنی نوێنەراندا گیراوە کە پێکهاتووە لە 20,000,000,000 دینار، 15.5,000,000 دۆلار، بڕێکی زۆر زێڕ و کێڵگەیەکی بەخێوکردنی ئەسپ. هەروەها عەلا سەمیر جبووری، بەڕێوەبەری کۆمپانیای دابەشکردنی کارەبای ناوەڕاست، بڕی 76,000,000,000 دینار و چەندین ماڵ و موڵکی لێ وەرگیراوەتەوە.

سزادانی بەڕێوەبەری پێشووتری دەستەی گشتیی باجەکان

دادگای عێراق سزای 10 ساڵ زیندانیی بۆ ئوسامە حوسام جەودەت و هاوسەرەکەی دەرکردووە بە تۆمەتی سپیکردنەوەی پارە. دەست بەسەر 10 موڵکیدا گیراوە لە بەغداد و 12 موڵک لە وڵاتی تورکیا کە بەناوی هاوسەرەکەیەوە بوون. جگە لە دەستبەسەرداگرتنی پارەکانی لە بانکەکانی تورکیا و کوەیت، بڕی 32,000,000,000 دیناریش وەک پێبژاردن سزای دراوە.

گەڕانەوەی پارەی هێڵە ئاسمانییەکان و دەستبەسەرداگرتنی دۆلاری قاچاخ

دادگای لێکۆڵینەوەی دەستپاکی لە ڕەسافە ڕایگەیاند، توانیویانە بڕی 19,000,000,000 دینار بۆ گەنجینەی هێڵە ئاسمانییەکانی عێراق بگەڕێننەوە. هاوکات لە بازگەیەکی نێوان سەڵاحەدین و دیالە، لەنێو ئۆتۆمبێلێکی جۆری نیسان پڕاکتیکدا، دەست بەسەر 4,000,000 دۆلاری ئەمریکیدا گیراوە کە هەوڵی قاچاخبردنی دراوە.

کۆى پارە و سامانى دەستبەسەرداگیراو:

کۆی پارەی کاش: 219 ملیار دینار و 85 ملیۆن دۆلار.

عەدنان جومەیلی: 98 ملیار دینار، 11 ملیۆن دۆلار و 70 موڵک.

عەلا سەمیر جبووری: 76 ملیار دینار و چەندین موڵک.

عالیە نسەیف: 20 ملیار دینار و 15.5 ملیۆن دۆلار.

عەلی مەعارج: 11 ملیۆن دۆلار و 4 ملیار دینار.

ئوسامە حوسام: 10 موڵک لە بەغداد، 12 موڵک لە تورکیا و 32 ملیار دینار پێبژاردن.