ئەنجوومەنى ڕاژەى گشتیى ڕاپۆرتێکی شیکارى لەسەر قۆناغى یەکەمى دامەزراندنى 250 کەس لە سەر میلاکى گرێبەستى پارێزگاى هەڵەبجە بڵاوکردەوە و دەڵێت، زیاد لە نۆ هەزار کەس فۆڕمەکەیان پڕکردووەتەوە و ڕکابەری دەکەن بۆ ئەو 250 هەلەی دامەزراندن.

9000 فۆڕم تۆمارکراوە

فەرمانگەی میدیا و زانیاریی حکومەتی هەرێمی کوردستان ڕایگەیاند، دواى کۆتاییهاتنى قۆناغى پڕکردنەوەى فۆڕمى داواکاریی دامەزراندن،  نۆ هەزار و شەش فۆڕمى ئەلیکترۆنیی لەلایەن ئەنجوومەنی ڕاژەوە تۆمارکراوە و کێبڕکێ دەکەن لەسەر ئەو 250 پۆستەی بە گرێبەست لە هەڵەبجە دادەمەزرێن.

250 پۆست لەسەر 32 پسپۆڕى

ئاماژە بەوەشکراوە، ئەو 250 پۆستە لەسەر 32 پسپۆڕی جیاوازە و لەسەر میلاکى گرێبەستى فەرمانگەکانى حکومەتى هەرێمی کوردستانە لە سنوورى پارێزگاى هەڵەبجە.

لەکوێ ئەنجامەکان بڵاودەکرێتەوە؟

فەرمانگەی میدیا و زانیاریی، ڕاشیانگەیاندووە، کارکردن لە سەر ئەم پڕۆسەیە بە هەماهەنگیى لەگەڵ پارێزگاى هەڵەبجە بەردەوامى هەیە و ئەنجامى قۆناغەکانى دیکەى پڕۆسەکە لە سایتى فەرمیى ئەنجوومەنى ڕاژەی گشتیى بڵاو دەکرێتەوە.