مەزهەر محەممەد ساڵح، ڕاوێژکاری ئابووریی سەرۆکوەزیرانی عێراق لەبارەی ناکۆکییەکانی هەرێمی کوردستان و حکومەتی فیدراڵ لەسەر داهاتی نانەوتی ڕایگەیاند، هەماهەنگی و گونجانی هەرێمی کوردستان و حکومەتی فیدراڵ لە جێبەجێکردنی یاساکان، دەبێتە هۆی زیادکردنی نانەوتی و فرەجۆرکردنی ئابووریی عێراق.

کاریگەریی ئاستەنگە نێودەوڵەتییەکان لەسەر بودجە

ڕاوێژکاری ئابووریی سەرۆکوەزیرانی عێراق لەبارەی کاریگەریی کێشە نێودەوڵەتییەکان ڕوونیشیکردەوە، کێشەکانی گەرووی هورمز و کارنامەی سەرۆکوەزیران ڕەنگدانەوەیان لەسەر بودجەی ساڵی 2027 دەبێت.

گرنگیی سەقامگیریی سیستمی دارایی

مەزهەر محەممەد ساڵح، ڕاوێژکاری ئابووریی سەرۆکوەزیرانی عێراق لەبارەی سەقامگیریی دارایی گوتیشی، "ئەگەر سیستمی دارایی عێراق سەقامگیر بێت و بە لێهاتوویی و هەماهەنگییەکی بەرز کار بکەن، ئاماژەیەک دەبێت بۆ پەرەپێدان و فرەجۆرکردنی ئابووری، جگە لەوەش داهاتەکانی بودجە فرەجۆر دەکات، بەبێ هیچ بۆشاییەک کە لە دەرئەنجامی لێکتێنەگەیشتن دروست دەبێت".

هەماهەنگیی هەرێم و ناوەند و زیادبوونی داهات

ڕاوێژکاری ئابووریی سەرۆکوەزیرانی عێراق لەبارەی جێبەجێکردنی یاساکان زیاتر ڕوونیکردەوە و گوتی، "ئەمەش بیرۆکەیە، ئەگەر گونجانمان هەبێت لە جێبەجێکردنی یاساکان لە نێوان هەرێم و ناوەند دەبێتە هۆی زیادکردنی داهاتی نانەوتی، لە هەمان کاتیشدا سەقامگیری زیاد دەکات، فرەجۆرکردنی ئابووریی عێراقیش ئامانجەکەیە".

بەشداریی کەرتی تایبەت لە بەرهەمی ناوخۆیی

مەزهەر محەممەد ساڵح لەبارەی فرەجۆرکردنی ئابووریی عێراقەوە باسی ئەوەی کرد، "فرەجۆرکردنی ئابووریی عێراق و بەشداریی کەرتی تایبەت لە بەرهەمی ناوخۆیی، تێکڕای بەرهەمی ناوخۆیی لە 37%ـەوە بەرز دەکاتەوە بۆ 55%، ئەوەش دەرئەنجامی فرەجۆرکردنی داهاتی نانەوتییە".

تایبەتمەندییەکانی بودجەی ساڵی 2027

ڕاوێژکاری ئابووریی سەرۆکوەزیرانی عێراق لەبارەی کاریگەریی گەرووی هورمز و بەرنامەکانی سەرۆکوەزیران لەسەر بودجە گوتی، "بودجەی 2027 ڕەنگدانەوەی دوو شتە، یەکەم لابردنی کێشەکانی گەرووی هورمز، دووەم بەرنامەی سەرۆکوەزیران بەشێوەیەکی سەرەکی ڕەنگدانەوەی دەبێت لەسەر ئەم بودجەیە، بەتایبەتیش هاوبەشی لە نێوان دەوڵەت و کەرتی تایبەت".