قوباد تاڵەبانی، جێگری سەرۆکوەزیرانی هەرێمی کوردستان لە چوارچێوەی سەردانەکەیدا بۆ گەرمیان، لەگەڵ بۆردی وەبەرهێنانی ئیدارەکە کۆبووەوە و جەختی لە چڕکردنەوەی هەوڵەکان بۆ گەشەپێدانی دەڤەرەکە و پێشکەشکردنی ئاسانکاری بۆ وەبەرهێنەران کردەوە.

سەردانی جێگری سەرۆکوەزیران بۆ گەرمیان

قوباد تاڵەبانی، جێگری سەرۆکوەزیران سەردانی ئیدارەی گەرمیانی کرد و لە یەکەم وێستگەی کارەکانیدا لەگەڵ بۆردی وەبەرهێنانی گەرمیان کۆبووەوە. لەم دیدارەدا کە ڕۆژی چوارشەممە 15/7/2026 بەڕێوەچوو، هەڵسەنگاندن بۆ چۆنییەتی جێبەجێکردنی بڕیار و ڕاسپاردەکانی کۆبوونەوەکەی مانگی نیسانی ئەمساڵ کرا کە لە نێوان هەردوولادا ئەنجامدرابوو.

داواکاری بۆ ئاوەدانکردنەوەی بێ جیاوازیی ناوچەکان

جێگری سەرۆکوەزیران دەستخۆشی لە ئەندامانی بۆردی وەبەرهێنانی گەرمیان کرد بۆ ڕاپەڕاندنی کاروبارەکان و داوای لێکردن بۆ گەشەپێدان و زیاتر ئاوەدانکردنەوەی ناوچەکە کار بکەن. قوباد تاڵەبانی جەختی کردەوە کە نابێت هیچ جیاوازییەک لە نێوان ناوچەکانی گەرمیاندا بکرێت و پێویستە لە هەر ناوچەیەک بەپێی تایبەتمەندی و پێداویستییەکانی خۆی، پڕۆژەی وەبەرهێنان جێبەجێ بکرێت.

پشتیوانیکردنی بۆردەکە و کارکردن وەک یەک تیم

قوباد تاڵەبانی پشتیوانیی تەواوی خۆی بۆ بۆردی وەبەرهێنانی ئیدارەی گەرمیان دووپات کردەوە و ڕایگەیاند، هەموو ئەو فشارانەی لە ڕابردوودا کردوویەتی و ئێستاش دەیکات لەپێناو خزمەتکردنی خەڵک و گەشەپێدانی دەڤەرەکەدایە. ئاماژەی بەوەش کرد کە پێویستە ئەندامانی بۆردەکە وەک یەک تیم پێکەوە کار بکەن و ئاسانکاریی تەواو پێشکەشی وەبەرهێنەران بکەن بۆ ئەوەی ئاستی وەبەرهێنان لە گەرمیاندا بەرزبێتەوە.