شارەزایانی سەربەخۆی سەر بە نەتەوەیەکگرتووەکان نیگەرانی قووڵیان دەربڕیوە، بەرامبەر بەو ڕاپۆرتانەی ئاماژە بە بوونی زیاتر لە حەوت هەزار و 400 کۆچبەر دەکەن بەدرێژایی سنوورەکانی نێوان تونس و لیبیا، کە زۆربەیان خەڵکی ناوچە بیابانییەکانی باشووری ئەفریقان و لە مانگی حوزەیرانی ساڵی 2023ـەوە ڕووبەڕووی شێوازێکی سیستماتیکی دەستبەسەرکردنی زۆرەملێ، دەرکردنی بەکۆمەڵ و بازرگانیکردن بە مرۆڤەوە دەبنەوە.

تێوەگلانی هێزە ئەمنییەکانی تونس و لیبیا لە پێشێلکارییەکان

شارەزایان ئاماژە بە تێوەگلانی هێزە ئەمنییەکانی تونس و لیبیا و گرووپە نادەوڵەتییەکانی لیبیا دەکەن لەم پێشێلکارییانەدا، بەگوێرەی ئەو لێدوانانەی لە کۆچبەران وەرگیراون، کارمەندانی ئەمنی بە تەزووی کارەبا و ئاسن و سەگ ئەشکەنجەیان داون مامەڵەی خراپ و نەشیاویان لەگەڵ کراوە، ئەمە جگە لە تەقەکردن، بە مەبەستی ترساندن و سزادانیان، هەروەها سووکایەتی پێکردنیان و دەستبەسەرداگرتنی کەلوپەلە تایبەتەکانیان، لەوانە مۆبایل و پاسپۆرت و بەڵگەنامە کەسییەکان، دابیننەکردنی خۆراک و چاودێری پزیشکییە پێویستەکان، بەشێک لە ڕاپۆرتەکەش ئاماژە بە بوونی حاڵەتەکانی دەستدرێژیکردنە سەر ژنان و دەستدرێژی جەستەیی توند بۆ سەر پیاوانیش دەکەن.

توندوتیژی و پشتگوێخستن بووەتە هۆی گیانلەدەستدان و بێسەروشوێنبوونی کۆچبەران

شارەزایان نیگەرانیی قووڵیان دەربڕیوە سەبارەت بە مامەڵەکردنی خراپ و سزادانی نامرۆڤانە، ئاماژەیان بەوەشکردووە، کە توندوتیژی و پشتگوێخستن بووەتە هۆی گیانلەدەستدان و بێسەروشوێنبوونی کۆچبەران، هەروەک باس لە ئەگەری بوونی گۆڕی بەکۆمەڵی کۆچبەرانیش دەکرێت، لە نزیک دامەزراوە سەربازییەکان لە لیبیا.

کۆچبەران وەک کالا مامەڵەیان لەگەڵ دەکرێت

ئەو پسپۆڕانە دەڵێن کۆچبەران، کە لە ناویاندا ژنانی دووگیان و منداڵی بێسەرپەرشت هەن، وەک کاڵا مامەڵەیان لەگەڵ دەکرێت و لە سنووری تونس و لیبیا بازرگانییان پێوە دەکرێت لە بەرامبەر پارە، سووتەمەنی و ماددە هۆشبەرەکان، هەندێکیان کاری زۆرەملێیان پێدەکرێت، یان بە کۆیلەکردنی سێکسی و ڕفاندن لە بەرامبەر وەرگرتنی پارەدا.