ئەنجوومەنی وەزیرانی هەرێمی کوردستان لە کۆبوونەوەی ئەمڕۆیدا چەند بڕیارێکی نوێی لە بەرژەوەندی هاونیشتمانییان دەرکرد، کە داشکاندنی لە قەرزی کەڵەکەبووی کارەبا و درێژکردنەوەی لێخۆشبوونی سزاکانی هاتوچۆ لەخۆدەگرێت.

درێژکردنەوەی داشکاندنی سزاکانی هاتوچۆ

ئەنجوومەنی وەزیرانی هەرێمی کوردستان بڕیاریدا بە درێژکردنەوەی ماوەی کارکردن بە بڕیاری داشکاندنی 20% بۆ سەرجەم جۆرەکانی سزای سەرپێچی هاتوچۆ.

داشکاندنی 50% بۆ قەرزی کارەبای ماڵان و کشتوکاڵ

هەروەها ئەنجوومەنی وەزیران ڕەزامەندی دا لەسەر داشکاندنی 50% لە کۆی قەرزی کەڵەکەبووی کارەبا بۆ هاوبەشانی کەرتی نیشتەجێبوون (ماڵان) و کەرتی کشتوکاڵ.

داشکاندنی 25% بۆ کارەبای بازرگانی

سەبارەت بە کەرتی بازرگانی و پڕۆژە پیشەسازییەکان، ئەنجوومەنی وەزیران بڕیاریدا بە داشکاندنی 25% لە کۆی قەرزی کەڵەکەبووی کارەبا. ئەم بڕیارە خاوەن کار و بازرگانان دەگرێتەوە کە بڕە پارەیەکی زۆری کارەبایان لایە و دەیانەوێت لەم قۆناغەدا قەرزەکانیان بۆ حکومەت بگەڕێننەوە.