وەزیرى دەرەوەی عێراق، لەگەڵ کاربەڕێکەری باڵیۆزخانەی ئەمریکا لە بەغداد کۆبووەوە و باسی دواین سەردانی زەیدی بۆ واشنتن و چاودێریکردنی جێبەجێکردنی ئەو ڕێککەوتنانەیان کرد، کە لەنێوان هەردوولا واژۆکراوە.

تاوتوێی سەردانەکەی زەیدی بۆ ئەمریکا

وەزارەتی دەرەوەی عێراق بڵاویکردووەتەوە، فوئاد حسێن و جۆشوا هاریس، لە کۆبوونەوەکەدا باسیان لە سەردانەکەی شاندی عێراق بە سەرۆکایەتی زەیدی بۆ ئەمریکا کردووە، لەگەڵ بەدواداچوون بۆ جێبەجێکردنی هاوکاریی دووقۆڵی لە بوارە جیاوازەکان.

گفتوگۆ لە بارەی سەردانەکانی سەرۆکوەزیرانی عێراق بۆ ئێران و سەردانەکانی داهاتووی

وەزیرى دەرەوەی عێراق و کاربەڕێکەری باڵیۆزخانەی ئەمریکا لە بەغداد، گفتوگۆیان لەبارەی ئەنجامی سەردانی سەرۆکوەزیران و شاندی عێراقیان بۆ ئێران کردووە، لەگەڵ ئاڕاستەی پەیوەندییەکانی نێوان بەغداد و ئەنقەرە و سەردانە چاوەڕوانکراوەکەی زەیدی بۆ سعودیە، کە دەبێتە مایەی بەهێزترکردنی هاوکاریی هەرێمایەتی و پەرەپێدانی هاوبەشیی دووقۆڵی.

تاوتوێکردنی پێشهاتەکانی ناوچەکە

فوئاد حسێن و جۆشوا هاریس، بەگوێرەى ڕاگەیێنراوەکەی وەزارەتی دەرەوەی عێراق، بیروڕایان لەسەر پێشهات و دۆخی ناوچەکە ئاڵوگۆڕکردووە، بە تایبەت پرسی گەرووی هوورمز.

وەزیرى دەرەوەی عێراق و کاربەڕێکەری باڵیۆزخانەی ئەمریکا لە عێراق، جەختیان لە پێویستی دوورکەوتنەوە لە پەرەسەندن و پاراستنی ئاسایش و سەقامگیریی هەریمایەتی کردووەتەوە، گفتوگۆیان لەسەر کاریگەریی پێشهاتە هەرێمایەتییەکان لەسەر ئابووریی عێراق و بازاڕی نەوت کردووە.