پووختەى هەواڵەکە

• هەناردەى نەوتى عێراق لە مانگى ڕابردوودا گەیشتووەتە 73 ملیۆن بەرمیل.
• سۆمۆ: هەرێمى کوردستان دەتوانێت هەناردەى نەوت بگەیەنێتە 400 هەزار بەرمیلی ڕۆژانە.
• سۆمۆ: داخستنى گەرووى هوورمز 80 ملیار دۆلار زیانى بە عێراق گەیاندووە.
• هەرێمى کوردستان دەتوانێت تاوەکو 2030 هەناردەى نەوت بگەیێنێتە یەک ملیۆن بەرمیل لە ڕۆژێکدا.

---

عەلى نزار، بەڕێوەبەرى گشتیی کۆمپانیاى بە بازاڕکردنى نەوتى عێراق (سۆمۆ)، ئاماژەى بەوەکردووە، کۆى هەناردەى نەوت لە مانگى ڕابردوودا گەیشتووەتە 73 ملیۆن بەرمیل، پێشبینیش دەکرێت داهاتەکەى بگاتە چوار ملیار و 500 ملیۆن دۆلار. ئەوەش دەبێتە بەرزترین داهاتى بەدەستهاتووى نەوت لەدواى دەستپێکردنى جەنگى ئەمریکا و ئێران لە 28ـى شوبات.

---

ئامارەکان چى دەڵێن؟

• هەناردەى نەوت لە دوو ڕۆژى سەرەتاى ئەم مانگەدا گەیشتووەتە10  ملیۆن بەرمیل.
• هەرێمى کوردستان دەتوانێت، ئاستى هەناردەى نەوت بگەیەنێتە400  هەزار بەرمیل لە ڕۆژێکدا.
• تاوەکو ساڵى 2030، دەتوانێت بڕەکە بەرزبکاتەوە بۆ یەک ملیۆن بەرمیل لە ڕۆژێکدا.
• لە بارەى زیانەکانى داخستنى گەرووى هوورمز، کە بە شادەمارى ئابوورى و ڕێڕەوى هەناردەى %90ـى نەوتى عێراق دادەنرێت، بەڕێوەبەرى سۆمۆ ئاشکرایکرد، لە سەرەتاى جەنگەوە زیانى80  ملیار دۆلار بەر عێراق کەوتووە.

یەک ملیۆن بەرمیلى ڕۆژانە بۆ پاڵاوگەکانى تورکیا

• عەلى نزار: عێراق ناتوانێت ڕۆژانە یەک ملیۆن بەرمیل نەوت ببەخشێتە تورکیا.
• نەوت کاڵایەکى سەرەکى وڵاتە، مەبەستى ئەردۆغان لە خستنەڕووى ئەو بابەتە لەم کاتەدا دڵنیاییدانە بە پاڵاوگەکانى ناوخۆى تورکیا کە وڵاتەکەیان دراوسێى عێراقە و دەتوانێت تەواوى پێداویستییەکانیان لە نەوت بۆ دابین بکات.
• عەلى نزار: دابینکردنەکە بە نرخى جیهانى و نرخى ڕاگەیێنراو دەبێت، بەبێ داشکاندنی نرخ.
• عەلى نزار: پاڵاوگە هەیە لەناو تورکیا تواناکەى لە داهاتوودا دەگاتە یەک ملیۆن بەرمیلى ڕۆژانە و زیاتریش.
• عێراقیش دەتوانێت پێداویستییەکانى لە نەوتى خاو بۆ دابین بکات، دەشتوانن لە داهاتوودا لە ڕێگەى بۆرییەوە هەناردەکە زیاد بکەن.
• ئەو هێڵەى لە ناوخۆى تورکیادایە، تواناى هەناردەکردنى ملیۆنێک و 500 هەزار بەرمیل نەوتى لە ڕۆژێکدا هەیە.
• ئەوەش ڕێگە خۆشدەکات بۆ عێراق، ڕۆژانە یەک ملیۆن بەرمیل بۆ پاڵاوگەکانى تورکیا لە کاتى پێویستدا دابین بکات.
• بڕە زیادەکەشى لە ڕێگەى بەندەرى جەیهانەوە هەناردەى بازاڕەکانى جیهان بکرێت.

ئەوە لە کاتێکدایە، عێراق هەوڵى ڕاکێشانى هێڵێکى نەوت لە بەسڕەوە بۆ حەدیسە و دواتر درێژکردنەوەى بۆ بەندەرى بانیاسى سووریا و پیشخابوور لەسەر سنوورى تورکیا.

بۆ ئەو مەبەستەش وەزارەتى نەوتى عێراق، بۆ پارەدارکردنى پڕۆژەکە یاداشتنامەیەکى لێکتێگەیشتنی لەگەڵ کۆمپانیاکان کردووە و چاوەڕوان دەکرێت تێچووى ڕاکێشانى بۆرییەکەش بگاتە 15 ملیار دۆلار.

زانیارى زیاتر بۆ تۆ