• بە فەرمی هەوڵێک لە عێراق دەستیپێکردووە، بۆ جێگیرکردنی پیتە تایبەتەکانی زمانی کوردی لە سنووری سیستمە ئەلیکترۆنی و بەڵگەنامە فەرمییەکاندا
• پۆڵا شەهید سیروان دەستپێشخەریی کردووە
• هەوڵەکە لە سنووری ماددەی 140 چڕتر دەکرێتەوە
• چاودێران بە پێشهاتێکی گرنگی سیاسی و کارگێڕی وەسفی دەکەن

---

پۆڵا شەهید سیروان پەرلەمانتاری فراکسیۆنی یەکێتی لە ئەنجوومەنی نوێنەرانی عێراق، بە فەرمی، نووسراوێکی لەبارەی ئەم پرسە، ئاڕاستەی وەزارەتی ناوخۆی عێراق کردووە، کە ئامانج لێی:

• چارەسەرکردنی ڕیشەیی کێشەی تەکنیکیی نەنووسینی پیتە تایبەتەکانی زمانی کوردییە
• چارەسەرکردنی ئەو کێشە کارگێڕییەیە کە چەندین ساڵە بەرۆکی ناوی هاونیشتمانییانی گرتووە
• چەسپاندنی پیتە تایبەتەکان لەسەر بەڵگەنامەکانی وەکو کارتی نیشتمانی، پاسپۆرت، کارتی زانیاری و فۆڕمی خۆراک جێبەجێ دەکرێت

---

نووسراوەکە لەلایەن بریکاری وەزیری ناوخۆی عێراقەوە هامشی کارگێڕی پێویستی لەسەر کراوە و ئاڕاستەی بەشی یاسایی کراوە بۆ مەبەستی بەدواداچوون و جێبەجێکردن

پۆڵا شەهید سیروان

---

لە چوارچێوەی ئەو نووسراوەی ئاڕاستەی وەزارەتی ناوخۆ کراوە، هاتووە:

• ئاماژە بە ماددەی (4/بەشی یەکەم) لە دەستووری هەمیشەیی عێراق دراوە، کە بە ڕوونی زمانی کوردی وەک زمانێکی فەرمی لە پاڵ زمانی عەرەبی چەسپاندووە
• نەبوونی پیتەکانی (پ، چ، ژ، گ، ڵ، ۆ، ێ، ڕ، ڤ، وو) لە سیستمە ئەلیکترۆنییەکانی دەوڵەتدا، تەنیا کێشەیەکی تەکنیکی نییە، بەڵکو پێشێلکارییەکی ئاشکرای دەستوورە و نادادپەروەرییە بەرامبەر بە مافی هاوڵاتیبوون

---

لە بەشی کۆتایی نووسراوەکەدا، چەند ناوێکی کوردی وەکو نموونە هێنراونەتەوە، کە چۆن لە ئاستی کەموکوڕییە تەکنیکییەکاندا، واتای ناوەڕۆکی ناوەکان دەگۆڕێن، بە نموونە:

• ژیان – زیان
• پشتیوان – بشتیوان
• ڕزگار – رزکار
• گەوهەر - کوهر