ناوەندی ئاماری ئێران رایگەیاند، هەردوو پارێزگای سنە و کرماشانی رۆژهەڵاتی کوردستان لە پلەکانی یەکەم و دووەمی پارێزگا ناسەقامگیرەکانی ئێرانن لەڕووی ئابورییەوە بۆ ساڵی 2023.

بەگوێرەی دوایین راپۆرتی ناوەندی ئاماری ئێران، لە ناو 31 پارێزگای ئێراندا، هەردوو پارێزگای سنە و کرماشانی رۆژهەڵاتی کوردستان، لە رووی ناسەقامگیریی ئابووری، هەڵاوسان و بێکاریی زۆرەوە، پلەکانی یەکەم و دووەمیان گرتووە.

لەراپۆرتەکەی ناوەندی ئاماری ئێران بۆ ناسەقامگیریی ئابووری، پشت بە زۆریی رێژەی بێکاری، کەمی داهاتی تاک و هەڵاوسانی بازاڕ بەستراوە، تێدیا پارێزگای کرماشان بە رێژەى 62.4% لە پلەی یەکەم دادەنرێت، لە رووی ناسەقامگیریی ئابووری و کەمی داهاتی تاک و بەرزبوونەوەی رێژەی بێکاریی تێیدا لە دوای پارێزگای کرماشانیش، پارێزگای سنەی رۆژهەڵاتی کوردستان بە رێژەی 60.8% پلەی دووەمى گرتووە.

هەر بەگوێرەى راپۆرتەکە، پارێزگاکانی یەزد و لوڕستان لە پلەکانی سێیەم و چوارەمدان، لە بەرامبەردا تارانی پایتەخت لە ریزبەندی یەکەمەکانی پارێزگاکانی ئێران دانراوە لە رووی کەمیی هەڵاوسان و سەقامگیریی ئابووری تێیدا.

ناوەندی ئاماری ئێران لەدوایین راپۆرتیدا سەبارەت بە رێژەی هەڵاوسان بۆ ساڵی 2023 لە ئێران رایگەیاندبوو، ساڵی 2023 ئێران نزمترین ئاستی هەڵاوسانی تۆمارکردووە.