پووختەى هەواڵەکە

• تەرمى دووان لە منداڵەکان دۆزراوەتەوە و ڕادەستى کەسوکاریان کراوە.

• گەڕان بە دواى منداڵە گەورەکەى خێزانەکەدا بەردەوامە.

• 13 ڕۆژ لەمەوبەر بەلەمە چووپەکەیان لەنێوان تورکیا و یۆنان تەقى.

کەناڵ8 زانیاریى ئەوەى دەستکەوت، تەرمی دووان لە منداڵەکانى خێزانەکەى سلێمانی ڕادەستى کەسوکاریان کراوەتەوە، کە 14ـى مانگ لەنێوان تورکیا و یۆنان خنکابوون، سبەی تەرمەکان ڕەوانەى فڕۆکەخانەی هەولێر و لەوێوە بۆ سلێمانی بەڕێدەکرێن، تێچووى گەڕانەوەکەش لەسەر ئەرکى قوباد تاڵەبانی جێگری سەرۆکى ئەنجوومەنى وەزیرانە.

بەرزان ڕەزا خاڵۆى منداڵەکان بۆ کەناڵ8:

• دواى گەڕانەوەی تەرمەکان پرسەیان بۆ دادەنێین.

• نموونەی دی ئێن ئەی لە خوشک و زاواکەمان وەردەگیرێت.

• بەراورد دەکرێت بە تەرمی هەر منداڵێک کە لە داهاتوودا لەو ناوچەیە بدۆزرێتەوە.

• تیمەکان لە تورکیا بەڵێنیان داوە بە بەردەوامی بۆ دۆزینەوەی تەرمی هەستیارى 12 ساڵە بگەڕێن.

چیرۆکەکە

خێزانەکەى سلێمانى لە پێنج ئەندام پێکهاتبوون، دایک و باوک و سێ منداڵ، 13ـى تشرینى یەکەم، بەهیواى گەیشتن بە ئەورووپا بە بەلەم هەوڵیاندا لە ئاوەکانى نێوان تورکیا و یۆنان بپەڕنەوە.

ڕۆژی 14ـی مانگ، بەلەمەکەیان کە ئەم خێزانە و دوو قاچاخچى و کۆچبەرێکی دیکەی هەڵگرتبوو ژێرئاو کەوت و تەنیا ژن و پیاوەکە و دووان لە قاچاخچییەکان و کۆچبەرەکەی دیکە ڕزگاریان بوو.

زانیاریى زیاتر بۆ تۆ:

تەرمى منداڵێکیان نەدۆزراوەتەوە؛ خێزانەکەى سلێمانى داواکارى هەیە