نزیکەی 200 هاوڵاتی عێراقی لەلایەن کۆمپانیایەکی گەشتیاریی وەهمییەوە خەڵەتێنراون و بەناوى گەشتکردن بۆ سووریا، 100 ملیۆن دیناریان براوە.

بەگوێرەی میدیا عێراقییەکان، 200 هاوڵاتی پارێزگاکانی ناوەڕاست و باشوور، لەگەڵ کۆمپانیایەکی گواستنەوەی وەهمی رێککەوتوون بۆ گەشتکردن بۆ وڵاتی سووریا، بەڵام لە کۆتاییدا فێڵی لێکردوون و بڕی 100 ملیۆن دیناری لێکۆکردوونەتەوە و خۆی ونکردووە.

دوای ئاشکرابوونی رووداوەکە، هێزە ئەمنییەکانی عێراق دەستیان بە لێکۆڵینەوە کردووە و توانیوویانە بەڕێوەبەری کۆمپانیاکە لە شاری نەجەف دەستگیربکەن.

میقداد میری، گوتەبێژی وەزارەتی ناوخۆیی عێراق، بە میدیا عێراقییەکانی راگەیاندبوو، لە رێگەی بەڕێوەبەرایەتی رووبەرووبوونەوەی تاوانی رێکخراوەوە، دەیان کەس لەسەر ئەو دۆسیانە دەستگیرکراون و دەیان کۆمپانیاش رێوشوێنی یاسایی توندیان لە بەرامبەر گیراوەتە بەر، چاودێریی وردی کۆمپانیاکانی گەشتیاری و ئاڵۆگۆڕکردنی دراو و حەواڵەکان دەکرێت.

میدیا عێراقییەکان ئاماژە بەوەش دەکەن، هەرچەندە نزیکەی 40 سکاڵا لە دژى بەڕێوەبەری کۆمپانیاکە لەلایەن ئەو هاوڵاتییانەوە تۆمارکراوە، بەڵام دواتر بە بارمتەی دارایی لەلایەن دادوەری لێکۆڵینەوەوە ئازادکراوە.