سلێمانى باوەش بۆ گەورەترین فێستیڤاڵی تەندروستی دەکاتەوە

نەخۆشخانەى شار لە سلێمانى فۆتۆ؛ حەمە سوور

پووختەى هەواڵەکە

ئەمڕۆ فێستیڤاڵی ساڵانەی تەندروستی لە شاری سلێمانی دەستپێدەکات.
فێستیڤاڵەکە ماوەى دوو ڕۆژ بەردەوام دەبێت و لە پارکى ئازادى بەرێوەدەچێت.
سلێمانى جگە لەوەى پایتەختى ڕۆشنبیرییە زۆرجار وەک پایتەختى تەندروستیش ناودەبرێت.

لە فێستیڤاڵی ساڵانەی تەندروستیی سلێمانی چەندین پشکنینی تەندروستی بە بێبەرامبەر بۆ هاونیشتمانییان دەکرێن و هۆشیاری و ڕێنمایی تەندروستی لەلایەن خوێندکارانی بەشە پزیشکییەکانەوە پێشکەش دەکرێت.

وردەکارى فێستیڤاڵەکە:

لە کاتژمێر 5:00ـى ئێوارە تاوەکو 10:00ـى شەو پێشوازى لە هاونیشتمانییان دەکرێت.
زیاتر لە 20 کۆشکدا پشکنینى بێبەرامبەر بۆ بەشداربووان دەکرێت.
ئامانجى هۆشیارکردنەوە و گرنگیدانە بە تەندروستیى هاونیشتمانییان.

لە فێستیڤاڵەکەدا خوێندکارانى کۆلێجەکانى پزیشکى ددان، پزیشکى دەرمانسازى، پەرستارى و زانست و بەشە پزیشکییەکانى دیکەش بەشدارى تێدا دەکەن.

زۆرجار لە کۆڕبەند، کۆنفرانس و بۆنە پزیشکییەکاندا نازناوی پایتەختى تەندروستى بۆ سلێمانی بەکاردەهێنرێت، ئەوەش بەهۆى پێگەی پێشەنگایەتی شارەکەیە لە پێشکەشکردنی خزمەتگوزارییە پزیشکییەکان لەسەر ئاستی هەرێمی کوردستان و عێراق.