DFG’ê da zanîn ku di meha Tebaxê de derbarê 4 rojnamevanan lêpirsîn hatiye vekirin, gef li 2 rojnamevanan hatiye xwarin û di meha Tebaxê de 33 rojnamevan girtî ne. 

Komeleya Rojnamegeran a Dîcle Firatê (DFG), Rapora Binpêkirina Mafan a Meha Tebaxê eşkere kir.

DFG’ê got, “Di meha Tebaxê de 2 rojnamevan bi êrişan re rû bi rû man, kesekî li dijî Ofîsa Rojnameya Evrenselê ya Îzmîrê êrişa çekdarî pêk anî. 

Di meha Tebaxê de şopandina nûçeyan a 2 rojnamevanan hate astengkirin û gef li 2 rojnamegeran hate xwarin.

Astengkirina Malperan

DFG’ê destnîşan kir ku yek ji mijara derketî pêş jî astengkirinên xwegihandina nûçeyan bûye û wiha domand: Saziya Agahiyên Teknolojiyê û Ragihandinê (BTK) di meha Tebaxê de hesabên Instagramê ya Ajansa Welat û Rojnameya Xwebûnê ku bi Kurdî weşanê dikin, hesabê Instagramê yê rojnameya Yenî Yaşamê û KAOS GL’ê asteng kir. Her wiha saziya navborî hesabên X’ê yê Ajansa Nûçeyan a Firatê û Ajansa Nûçeyan a Etkînê jî jixwegihandinê re asteng kir. Di vê meha bihûrî de xwegihandina malpera Rojnameya Yenî Demokrasiyê jî hate astengkirin. Di meha Tebaxê de 32 malperên înternetê, URL’ên 7 nûçeyan û 43 heabên medyaya dîjîtal hatin astengkirin. RTUKê cezayê reşkirina ekranê ya 5 rojan li televîzyona TELE1’ê birî û 5 caran jî cezayê sekinandina bernameyê birî. 

Binpêkirinên li dijî Rojnamevanan

• 2 rojnameger û avahiyeke rojnameyê rastî êrişê hatin.
• Gef li 2 rojnamevanan hate xwarin û 2 rojnamevan dema nûçe dişopandin hatin astengkirin.
• Derbarê 4 rojnamevanan de lêpirsîn hate destpêkirin.
• Darizandina 7 rojnamevanan domiya. 
• Li girtîgehan niha 33 rojnamevan hene û karê 13 rojnamegeran hate bidawîkirin. 
• Ji bo TELE1’ê 5 caran cezayê sekinandina bernameyê û 5 rojan jî reşkirina ekranê hate birîn.
• 32 malperên înternetê hatin girtin û xwegihandina 7 nûçeyan hate astengkirin. 
• 43 hesabên medyaya dijîtal û parvekirin hatin astengkirin.