Wezîrê Perwerdehiyê yê Sûriyeyê Mihemed Ebdilrehman Tirko der barê biryarnameya Ehmed Şeri ya perwerdekirina bi zimanê Kurdî daxuyanî da.

Tirko di daxuyaniya xwe de wiha got: "Di vê kêliya giring a neteweyî de, derxistina biryarnemaya Hejmar 13 a 2026an ji aliyê Birêz Serokê Komarê ve piştrastkirineke nû ye ku Sûriye bi dîrok û misyona xwe ya şaristanî ya dewlemend, li ser pirrengiya gelê xwe ava bûye û yekîtiya wê bi rêzgirtina nasnameyên wan ên çandî û zimanî di çarçoveyek neteweyî ya berfireh de ku kesî ji derve nahêle û ti pêkhateyan ji holê ranake, tê xurtkirin."

Pê de çû û got: Pesendkirina hînkirina zimanê Kurdî li dibistanên giştî, wekî ku di biryarnameyê de hatiye destnîşankirin, gavek bihêz di xurtkirina nirxên hevwelatîbûna wekhev de û xurtkirina mafên çandî yên welatiyên Kurd wekî beşeke yekgirtî ya tevna neteweyî ya Sûriyeyê ye. Ew beşdariyeke berbiçav e ji bo parastina pirrengiya çandî wekî şaxek ji dewlemendiya şaristanî û civakî ya dewleta Sûriyeyê ye û dîtineke zelal a pabendbûna dewletê bi mafên perwerdehî û çandî yên welatiyên xwe bêyî cudahî yan jî derxistinê ye."

Tirko wiha got: "Li ser bingeha berpirsiyariya me ya neteweyî û perwerdehî, em di Wezareta Perwerdehiyê de piştrast dikin ku em ê dest bi amadekirina rêwerzên birêveberiyê û biryarên rêziknameyî bikin. Gavên pêwîst ji bo bicihanîna bendên vê biryarnameyê di zûtirîn dem de, misogerkirina bicihanîna wê ya tavilê û bi bandor di hemî mijarên têkildarî karê Wezaretê de, di heman demê de pabendbûna bi prensîbên perwerdehiyê yên damezrandî û pîvanên akademîk û garantîkirina sepandineke hevseng û dîsîplînkirî ku bigihe armancên xwe yên neteweyî û mirovî".

Tirko behsa dibistanên li Sûriyeyê jî kir û got: "Em bawer dikin ku dibistana Sûriyeyî dê înkubatorê sereke yê yekîtiya civakî bimîne û perwerde pira herî rastîn e ji bo xurtkirina têgihîştinê, kûrkirina hizira neteweyî û avakirina nifşên ku bi nasnameya xwe bawer in, bi cihêrengiya xwe serbilind in û pabendî yekîtiya welatê xwe, hem erd û hem jî gel in."

Di dawiyê de wiha got: "Em soz didin ku dibistanên me yên neteweyî dê bimînin qadên hizirê, ne jiholêrakirinê; platformên dadê, ne cudakariyê; amûrên ji bo parastina cihêrengiyê ji bo xurtkirina yekîtîyê di navbera kur û keçên vê neteweyê de; pirên evînê ku hemî Sûrîyeyiyan bi dil, ruh, teşe û naverokê ve girê didin."