Komîsyona Hewldana Konferansa Yekîtîya Neteweyî ya Bakurê Kurdistanê duh li navçeya Qoserê ya Mêrdînê, bi armanca yekîtîya neteweyî konferansek li dar xistin.

Komîsyona Hewldana Konferansa Yekîtiya Neteweyî ya Bakurê Kurdistanê ku ji PÊLKURD, Partiya Sosyaîst a Kurdistanê (PSK), Partiya Welatparêzên Kurdistanê (PWK) Tevgera Vejînê ya Kurdistanê (VEJÎN) û Kesayetiyên serbixwe yên Kurdistanê, pêk dihat li navçeya Qoserê ya Mêrdînê konferans li dar xist.

Dîwana konferansê ji Serokê Teşkîlata Mêrdînê ya PWKyê Nezîr Gelerî, Serokê Teşkîlata Mêrdînê ya PSKyê Salihê Omerî, nûnerê PÊLKURDê Halûk Gokalp, nûnerê  VEJÎNê Yusuf Aşîtî, kesayetê serbixwe Sedat Dogan pêk hat.

Di destpêka koferansê de ji bo şehîdên Kurdistanê bi sirûda neteweyî, Ey Reqîb, deqîqeyekê rêz hate girtin.

Paşê bi dore, Cîgirê Serokê Giştî yê PSKyê Serhad Amedî, rêvebirê PÊLKURDê Fûat Onen, berdevkê VEJÎNê Ferîd Azad, li ser navê kesayetîyên serbixwe Alî Oncû û Serokê Giştî yê PWKyê Mustafa Ozçelîk axivîn.

Piştî axaftina nûnerên Komîsyona Hewldana Konferansa Yekîtîya Neteweyî ya Bakurê Kurdistanê, Nûnerê Yekîtîya Netewî ya Kurdan Osman Karavîl, Serokê Cemîyeta Rojnamevanan a Anadolîyê Cemîl Aydemîr, Berpirsê Qoser TVyê îsmet Ketboga, keça kurd Rewşen, Cîhgirê Serokê Giştî yê PWKyê Bedran Acar, ciwanê kurd Kadir Unal bîr û rayên xwe anîn zimên, pirsên xwe kirin û axftvanan jî bersîvên wan pirsan dan.

Li gel rêvebir û endamên alîyên ku ev konferans organîze kirine, nûnerên PDK-BAKUR, HAK-PAR, Partîya Demokrat a Kurdistana Sûrîyê (PDK-S), Tevgera Azadîya Kurdistanê Li Sûrîyê, Partî Demokratî Kurd (El Partî), Weqfa Hemîdê Smeîlaxa, Nûbihar, Komeleya Cotkaran, Baroya Mêrdînê, Odeya Bazirganîya Nisêbînê, Komeleya Tixûbîyan, Koma Xebat Xursî, Endamê Meclîsa Şarederîya Qoserê Cebraîl Dînler û gelek rewşenbîr û sîyasetmedarên kurd beşdarî vê konferansê bûn.

Konferansa ku li Qoserê hate li dar xistin, bawerî û hêvîyên ava kirina temsîlîyeteke neteweyî, li Bakurê Kurdistanî geştir û xurtir kir.

Hate ragihandin ku di rojên pêş de dê li hinek bajarên din ên Bakurê Kurdistanê û Tirkîyeyê jî konferansên bi vî rengî dê werin li dar xistin.