Nûnerê Taybet ê Serokê Amerîkayê yê ji bo Kar û Barên Iraq û Sûriyeyê Tom Barrack bi rojeveke siyasî û leşkerî tê Iraqê.

Tom Barrack li Bexdayê dê li ser mijara bêçekkirina komên çekdar û li Hewlêrê jî dê li ser pêşeroja Sûriyeyê û têkiliyên di navbera partiyên Kurdî de nîqaş bike.

Armanca serdana nûnerê Amerîkî bo Bexdayê

Monîtorê ragihand ku Nûnerê Taybet ê Serokê Amerîkayê yê ji bo Kar û Barên Iraq û Sûriyeyê û balyozê li Tirkiyeyê Tom Barrack dê roja Duşemê bigihêje Bexdayê. Barrack dê bi Serokwezîrê Iraqê Elî Zeydî û berpirsên siyasî yên payebilind re bicive.

Mijara bêçekkirin û Korîdorên Bazirganiya Enerjiyê

Li gorî raporê, Tom Barrack li Bexdayê tekezî li ser banga Washingtonê ya ji bo bêçekkirina komên çekdar ên ku di êrîşa li ser nûnerên dîplomatîk ên Amerîkî de di meha Nîsanê de beşdar bûn kir. Di heman demê de, mijara ji nû ve sêwirandina rêya bazirganiya enerjiyê li herêmê dê mijarek din a sereke ya nîqaşên bi hikûmeta Iraqê re be.

Civîna bi rêberên Kurd re li Hewlêrê

Di rawestgeha duyemîn a gera xwe de, Tom Barrack dê roja sêşemê ya bê serdana Hewlêrê bike. Biryar e ku ew bi Serok û Serokwezîrê Herêma Kurdistanê re bicive. Nûnerê Amerîkî dê her wiha bi Serokê Yekîtiya Niştimanî ya Kurdistanê (YNK) Bafil Celal Talebanî û Serokê Partiya Demokrat a Kurdistanê (KDP) Mesûd Barzanî re hevdîtinên cuda bike.

Tom Barrack û Mezlum Ebdî

Xaleke din a girîng a rojeva Barack li Hewlêrê dê hevdîtina bi fermandarê giştî yê Hêzên Sûriyeya Demokratîk (HSD) Mezlum Ebdî re be. Tê payîn ku di civînê de hevkariya leşkerî û rewşa ewlehiyê ya li Rojavayê Kurdistan û bakurê Sûriyeyê were nîqaşkirin