Fermandarê giştî yê HSDyê li Hewlêrê bi Tom Barrack û Nêçîrvan Barzani re civiya da ku li ser pêşeroja siyasî ya Sûriyeyê û yekbûna hêzên xwe bi Şamê re nîqaş bikin.

Civîna sêalî li Hewlêrê

Fermandarê giştî yê Hêzên Sûriyeya Demokratîk (HSD), Mezlûm Ebdî li ser hesabê xwe yê Xê derbarê civîna li Hewlêrê peyamek belav kir û got, ew li Hewlêrê bi Serokê Herêma Kurdistanê Nêçîrvan Barzani û Nûnerê Taybet ê Amerîkayê yê ji bo Karûbarên Iraq û Sûriyeyê Tom Barack re civiya. Civîn di çarçoveya guhertinên siyasî yên li herêmê û pêşeroja Rojavayê Kurdistanê û Sûriyeyê de pêk hat.

Entegrebûna HSDyê bi Hikûmeta Sûriyeyê re

Fermandarê Giştî yê HSDyê Mezlûm Ebdî derbarê pêvajoya entegrebûnê jî da diyarkirin, di civînan de gavên ji bo entegrebûna HSD û Rêveberiya Xweser bi hikûmeta Sûriyeyê re hatine nîqaşkirin. Ebdî zêde kir ku şopandina pêkanîna van peymanan dê rêça siyasî xurt bike û aramiya welêt xurt bike.

Têkoşîna dijî terorê û çareseriyên siyasî

Li gorî fermandarê giştî yê HSDyê, di civînan de tekezî li ser piştgiriya berdewam a ji bo têkoşîna li dijî terorîzmê hat kirin. Her wiha wan tekezî li ser piştgiriya ji bo çareseriyeke siyasî li Sûriyeyê kir, da ku beşdariya hemû civakên cûda di hikûmetê û şekildana paşeroja welêt de misoger bibe.

Rola Herêma Kurdistanê di aramiyê de

Di beşek din a axaftina xwe de Mezlûm Ebdî bal kişand ser rola Herêma Kurdistanê di xurtkirina aramiya herêmê de. Fermandarê Giştî yê HSDyê destnîşan kir ku Herêma Kurdistanê dikare roleke girîng di handana diyalogê di navbera aliyan de bilîze da ku xizmeta ewlehiyê bike û aramiya herêmê bi tevahî biparêze.