Parlamentoya Ewropayê raporek dijwar li ser paşketina demokrasî û mafên mirovan li Tirkiyeyê pejirand, ku Enqereyê ew wekî "bê bingeh" û "îdeolojîk" bi nav kir.

Pesendkirina raporê bi piraniya dengan

Rapora salane ya Parlamentoya Ewropayê ya li ser Tirkiyeyê bi 381 dengan li dijî 107 dengan û 171 dengan bêalî hate pejirandin. Raport tekez dike ku demokrasî kêm bûye û dadwerî wekî amûrek ji bo tepeserkirina muxalefetê û dûrxistina rikeberên siyasî di hilbijartinên pêş de tê bikaranîn.

Şermezarkirina zextên li ser CHPyê 

Di raporê de biryara dadgehê ya betalkirina kongreya CHPyê bi tundî şermezar kirin. Parlamentoya Ewropayê vê tevgerê û dûrxistina serokê CHPyê Ozgur Ozel wekî "senaryoyek siyasî" ji bo qelskirina muxalefetê dibîne.

Pirsgirêkên vîze û pasaportên Schengen

Derbarê dayîna vîze û pasaportên Schengen de, ji Tirkiyeyê hatiye xwestin ku şertên ji bo hêsankirina rêwîtiya welatiyên xwe bicîh bîne. Parlamentoya Ewropayê rexne li hikûmeta Tirkiyeyê girt ji ber ku li şûna tedbîrên qanûnî, ew “bikaranîna xelet a hejmareke nediyar a pasaportên xizmetê” bikar tîne.

Daxwaza serbestberdana Demîrtaş û Kavala 

Parlamentoya Ewropayê daxwaza cîbicîkirina demildest a biryarên Dadgeha Mafên Mirovan a Ewropayê, bi taybetî jî serbestberdana Demîrtaş û Osman Kavala kir. Her wiha darizandin û girtina Şaredarê berê yê Stenbolê Ekrem Îmamoglu şermezar kirin.

Cezakirina rayedarên Tirkiyeyê

Di raporê de daxwaza çalakkirina sîstema cezayên mafên mirovan a YEyê li dijî rayedarên Tirk ên ku di binpêkirina mafan de beşdar in tê kirin. Wezîrê dadê yê niha û dozgerê giştî yê berê yê Stenbolê Akin Gurlek, digel kesên ku rola “qeyûman” dilîzin, wekî mînakên rayedarên ku divê werin cezakirin hatine nîşandan.

Mercê ji bo ji nû ve destpêkirina danûstandinên endamtiyê

Parlamentoya Ewropayê got ku ji bo vegera Tirkiyeyê bo ser maseya danûstandinên endametiya YEyê, divê pêşketineke rastîn di serweriya hiqûqê û pêvajoyên demokratîk de were dîtin.

Piştgiriya ji bo Yewnanistanê û sînorên avê

Di beşek din a raporê de, Parlamentoya Ewropayê piştgiriya xwe ji bo Yewnanistanê di nakokiya wê ya bi Tirkiyeyê re li ser çavkaniyên xwezayî û sînorên avê de diyar kir û bang li her du welatan kir ku li gorî peymanên navneteweyî diyalogê bidomînin.

Bersiva Wezareta Derve ya Tirkiyê

Wezareta Derve ya Tirkiyê rapor red kir û got ku ew li ser agahiyên xelet û îdiayên bê bingeh hatiye avakirin. Enqere dibêje ku rapor armanc dike ku têkiliyên stratejîk ên di navbera Tirkiye û Yekîtiya Ewropayê de têk bibe. Wezaretê parastina wezîrê dadê kir û got ku êrîşên li ser pergala dadweriya wê nayên qebûlkirin.