Li navçeya Şêladizê ya Amêdiyê li dijî astengiyên artêşa Tirkiyeyê xwepêşandanek hate lidarxistin û hêzên ewlehiyê nehiştin ku xwepêşandan berdewam bike.

Xwepêşandan ji aliyê encumenên ciwanan ên Şêladize, Sîryê û Dêrelokê ve bi armanca vekirina rêyek ku ji ber şerê di navbera artêşa Tirkiyeyê û PKKyê de hatibû girtin, hate lidarxistin.

Berê, encumenên ciwanan ên Şêladize, Sîryê û Dêrelokê bang li hemû beşên herêmê kirin ku roja Înê saet 3ê piştî nîvro li ber kolanan xwepêşandanek berfireh li dar bixin.

Armanca sereke ya xwepêşandanê daxwaza vekirina rêya gelê Rêkanê bû, ku heft sal in ji ber operasyon û êrîşên artêşa Tirkiyeyê hatiye girtin.

Li gorî komîteyê, di heft salên bihurî de nêzîkî 100 kes di bombebaranên Tirkiyeyê de hatine kuştin û 50 kesên din jî birîndar bûne.

Ji 99 gundên Şêladizê tenê heft gund ji nû ve hatine avakirin û artêşa Tirkiyeyê nahêle ku niştecih vegerin zevî û baxçeyên xwe.

Rewş li navçeya Amêdiyê dijwartir e. Ji 306 gundan, 206 gund bi tevahî hatine valakirin û tenê destûr tê dayîn ku 30 gund serdana erdên xwe bikin.