Rojnameya Hurriyetê îdîa kir ku yasayên derbarê pêvajoyê beriya parlamento bikeve bêhnvedanê dê derbikevin.

Pêvajoya çareseriyê û yasayên ji bo pêvajoyê li Tirkiye û Bakurê Kurdistanê rojeva herî germ e. Îdia û gotegotên derbarê dema derketina yasayan berdewam dikin. 

Rojnameya Hurriyetê ya Tirkiyeyê îdîa kir ku %85ê pêvajoyê qediya ye û li gorî raporên ji qadê dê pêşveçûn çêbibe, û îdîa kir qanûn dê berî dawiya havînê û berî ku Parlamento bikeve bêhnvedanê werin derxistin.

Nivîskarê Hurrîyetê Fatîh Çekîrge li ser agahiyên li pişt perdê yên derbarê pêvajoya çareseriyê de raporek weşand. Nivîsa Çekirge ya li ser vê mijarê wiha ye:

"Ez dikarim pêşketinên gengaz ên ku min ji agahiyên li pişt perdê bi dest xistiye wiha kurte bikim:

• Heta niha %85ê pêvajoyê qediya ye,
• Piştî daxuyaniya Îmraliyê were dayîn, pêvajoya radestkirina çekan dê bileztir bibe.
• Yekîneyên ewlehî û îstîxbarata Tirkiyeyê dê li ser pêvajoya bêçekkirinê rapor bikin.
• Li gorî raporên erênî, dê qanûnek derbarê endamên rêxistinê were derxistin.
• Xalên vê qanûnê dê kurt bin û dê demek diyarkirî ya 6-8 mehan hebe.
• Bi tevahî di civakê de tu têgihîştinek efûyê nayê afirandin.
• Hestên malbatên şehîd û leşkerên berê û nirxên neteweyî dê neyên acizkirin.
• Rastiya ku rêxistinê xwe hilweşandiye û çekên xwe danîne dê ji hêla Lijneya Ewlekariya Neteweyî ve were destnîşankirin.
• Piştre, berî dawiya havînê û berî ku Parlamento bikeve betlaneyê, dê qanûn werin derxistin."