Rojnameya Tirkiyeyê plana hikûmetê ya ji bo qanûna pêvajoya çareseriyê eşkere kir û got ku AK Partî dixwaze bi qasî ku pêkan be li ser qanûnê hevdengî hebe.

Her wiha rojnameyê da diyarkirin, pêşnûmeya qanûnê dê biçe Îmraliyê û heke li ser vegera endamên PKKyê nakokî tune be, dê di Tîrmehê de were pejirandin.

Rojnameyê got ku tevgerên li ser qanûna çarçovê dê piştî lûtkeya NATOyê zûtir bibin û AK Partî armanc dike ku qanûnê di Tîrmehê de di parlementoyê de derbas bike.

Li gorî rojnameyê, AK Partî dixwaze ku qanûn bi rêya lihevkirin û rêkeftinê were pejirandin û di vê çarçoveyê de, berî ku amadekirina pêşnûmeyê temam bibe, raya partiyên opozîsyonê ji bo bidestxistina lihevkirinê were girtin. 

Di heman demê de, DEM Partî israr dike ku divê pêşnûme di navbera endamên PKKyê de, wekî ku Enqere dibêje, cudahî neke û divê di pêşnûmeyê de pênaseya statuya yasayî ya Ocalan hebe.

Lê, çavkaniyên AK Partiyê ji rojnameya Tirkiyeyê re gotin ku statuya yasayî ya Ocalan di pêşnûmeyê de nayê behs kirin û tekez kirin ku statuya yasayî ji bo kesekî ku cezayê hepsa heta hetayê lê hatiye birîn nayê destnîşankirin. Çavkaniyên AK Partiyê gotin, “Her çend efû tune be jî, di derbarê statuya yasayî ya Ocalan de gav nayên avêtin.”

Şandeyeke ji AK Partiyê dê pêşnûmeyê bibe Îmraliyê û eger li ser bendên sereke yên têkildarî endamên PKKyê yên ku Tirkiye dibêje tevlî sûcan bûne û her wiha rewşa yasayî ya Ocalan lihevkirinek neyê kirin, di Cotmehê de dê bikeve rûniştina nû ya yasayî.

Di heman demê de, rojnameyê ragihand ku piştî ku qanûna çarçove di parlementoyê de were pejirandin û bikeve meriyetê, di qonaxa yekem de, endamên PKKyê yên ku Tirkiye dibêje di sûcan de beşdar nînin dê bi girseyî vegerin Tirkiyeyê.

Qanûna çarçove bi zelalî veger û derbasbûna ji sînor ji bo endamên ku Tirkiye dibêje tevlî sûcan nabin, kîjan hêzên ewlehiyê, çawa çekên xwe vekişînin û çi tedbîrên qanûnî li dijî kesên ku vedigerin dê werin girtin, destnîşan dike.

Li gorî rojnameyê, tê çaverêkirin ku kesên ku dozên wan hene an jî, wekî Tirkiye dibêje, tevlî sûcan bûne, di qonaxa yekem de vegerin welêt, lê ji ber ku qanûn demkî ye, divê hemî endamên PKKyê di nav demek diyarkirî de vegerin.