Amûrên giran ê rûxîner dest bi hilweşandina avahiya şaredariya kevin a Qamişloyê li navenda bazara bajêr kirin û ev yek bû sedema nerazîbûn û nakokiyên berfireh li nav niştecih û çalakvanan û bertekên tund derxistin holê.

Piştî du hefteyan ji dîtina nivîsa dîrokî û bingehîn a avahiyê, ku navê "Şaredariya Qamişliyê" bi Erebî û Fransî li ser nivîsîbû, hilweşandinê dest pê kir.

Berê, şaredariya Qamişloyê pabendbûna xwe ya parastina nivîsa dîrokî wekî cihekî mîrateya çandî piştrast kir û rave kir ku hilweşandin ji ber guncawnebûna avahiya kevin ji bo kar hatiye. Wan tekez kir ku nivîsa orîjînal, ku dîroka wê vedigere sala 1935an, dê were parastin û li muzexaneyên bajêr an jî di avahiya nû ya şaredariyê de were nîşandan.

Di vê navberê de, nêzîkî 21 rêxistin, komele û sazî, ku piraniya wan komên mafên mirovan ên li Qamişloyê ne, daxuyaniyek weşandin ku tekez li ser pêwîstiya parastina avahiya şaredariyê kirin, ku wan wekî "dîrokî" bi nav kir.

Rêxistinan di daxuyaniyekê de got, "Tevî ku sedsaliya damezrandina Qamişlo/Qamişlî/Zalînê di 20ê Tebaxa 2026an de nêzîk dibe û di demekê de ku rêxistinên civaka sivîl û komên çandî û civakî amadekariyên bîranîna vê bûyera dîrokî dikin, em bi balkêşî daxuyaniya ku ji hêla Şaredariya Qamişloyê ve der barê avahiya şaredariya kevin û nivîsa 1935an hatiye dayîn dişopînin.

Em bang dikin ku her tedbîrek ku dibe sedema rakirin an guhertina cihekî dîrokî yê avahiya şaredariya kevin were rawestandin û pisporên mîrateya mîmarî, endezyar, dîroknas, rêxistinên civaka sivîl û niştecihên bajêr di her biryarên der barê deverên dîrokî de beşdar bibin. Her wiha em bang dikin ku qeydeke fermî ya şûnwar û avahiyên mîratî li Qamişloyê were çêkirin û mekanîzmayên yasayî ji bo parastina wan werin danîn."