Tê payîn yasaya ji bo pêvajoya çareseriyê di 27ê Tîrmehê de pêşkêşî parlamentoya Tirkiyeyê bê kirin.

Hat ragihandin, di pêşnûmeqanûnê de ti xal ji bo Ocalan tine ye û ji bo endamên rêxistinê ne wekî efûyekî ye û ev yasa dê pêşiya berdana zêdetirî 4 hezar kesên di girtîgehan de ne, veke.

Di civînên di navbera Serokê Parlamentoyê Numan Kurtulmuş, û partiyên siyasî de, “lihevkirinek pêşîn” li ser pejirandina qanûnê berî ku parlamento bikeve bêhnevdanê hat bidestxistin. Armanc ew e ku pêşnûmeqanûn herî dereng heta nîvê Tebaxê bibe qanûn.

Hat ragihandin ku DEM Partiyê di danûstandinan de daxwazên kiriye ku divê di yasayê de dayîna statuyê ji Abdullah Ocalan re, nekategorîzekirina endamên rêxistinê wekî “tawanbar” û “bêtawan” cih bigire û yasa berpirsên payebilind ên PKKyê jî bihewîne. Li gorî agahiyan Kurtulmuş diyar kiriye ku di pêşerojê de gavên nû yên qanûnî dikarin werin nirxandin.

Hate îdîakirin ku pêşnûmeya AK Partiyê statuyek yasayî ya taybet nade Ocalan, lê gavên wekî sivikkirina şert û mercên li Îmraliyê, vekirineke ofîseke xebatê ji bo Ocalan û berfirehkirina çarçoveya mêvanan pêşbînî dike. 

Di pêşnûmeyê de bendên ji bo cezakirina kesên ku di êrişên çekdarî an bombeyî de beşdar in diparêze, lê rakirina tohmeta “endamtiya rêxistinê” dikare rêya serbestberdana zêdetirî 4,000 kesên ku niha di girtîgehê de ne veke.