لە مانگی ئابی 2014 چەکدارانی داعش پەلامارى ناوچەکانى شنگالیدا و دانیشتووانە ئێزدییەکەى رووبەڕووى کۆمەڵکوژى کردەوە.

نزیکەی 550 هەزار هاونیشتمانیی ئێزدی ئاوارەی چیای شنگال و رۆژئاوای کوردستان بوون، کە دواتر زۆربەیان گەڕانەوە بۆ هەرێمی کوردستان و لە کەمپەکاندا نیشتەجێبوون.

ئەم رووداوە کاردانەوەی جیهانی لێکەوتەوە و تاوەکو ئێستاش کاردانەوەکان بەردەوامە، بەگوێرەی داود خەتاری کە توێژەر و نووسەرە تاوەکو ئێستا زیاتر لە 10 وڵات و ئەنجوومەنی جیهانی، کۆمەڵکوژیى ئێزدییەکانیان بە جینۆساید ناساندووە.

لە یەکەم هەنگاویشدا ئەنجوومەنی مافەکانی مرۆڤ دێت، کە هەر ئەو ساڵە، رووداوەکەی بە جینۆساید ناساند، بە دوای ئەویشدا پەرلەمانی یەکێتیی ئەوروپا و ئەنجوومەنی پیرانی ئەمریکا و حکومەتەکانی بەریتانیا، فەڕەنسا و کەنەدا و چەندین وڵاتی دیکەش دێن.

ئەو وڵاتانەى کۆمەڵکوژیى ئێزدییەکانیان بە جینۆساید ناساندووە:

1. ئەنجوومەنی مافەکانی مرۆڤ (1-9-2014)
2. پەرلەمانی یەکێتیی ئەوروپا (27-3-2015)
3. ئەنجوومەنی پیرانی ئەمریکا (15-3- 2016)
4. حکومەتی بەریتانیا (20-4-2016)
5. حکومەتی فەڕەنسا (26-5-2016)
6. حکومەتی کەنەدا (17-6-2016)
7. حکومەتی سکۆتلەندا (23-3-2017)
8. حکومەتی ئەرمینیا (17-1-2018)
9. حکومەتی ئوسترالیا (26-1-2018)
10. حکومەتی هەرێمی کوردستان (3-8-2019)
11. حکومەتی پورتوگال (29-11-2019)
12. حکومەتی عێراق (1-3-2021)
13. حکومەتی بەلجیکا (15-7-2021)
14. ئەنجوومەنی ئاسایشى نێودەوڵەتى (10-5-2021)
15. لیژنەی لێکۆڵینەوەی نێودەوڵەتی -سووریا (16-6- 2016)
16. کۆمیتەی نێودەوڵەتیی جینۆسایدی جیهانی (15-3-2016)
17. حکومەتی ئەڵمانیا (19-1- 2023)