جەڵتەی مێشک، نەخۆشییەکە تیایدا بەهۆی گیران یان تەقینی خوێنبەرێکەوە، خوێنی پێویست ناگاتە بەشێکی مێشک، لە ئەنجامدا خانەکانی ئەو ناوچەیە بەبێ خوێن و ئۆکسجین دەمرن. ئەو کەسەی تووشی جەڵتەی مێشک دەبێت، دەکرێت چەند نیشانەیەکی هەبێت، بۆنموونە؛ لەدەستدانی هاوسەنگی، بێهێزی و بوونی ئازار لە لایەکی جەستە.

جەڵتەی مێشک حاڵەتێکی کتوپڕە، لە کاتی روودانیدا دەبێت کەسەکە بەزووترین کات بگەیەنرێتە نەخۆشخانەی فریاکەوتن، چونکە تاوەکو زووتر بگات، ئەگەری چارەسەرکردنی زیاترە.

نیشانەکان چین؟

• لەدەستدانی هاوسەنگی
• لەدەستدان یان لێڵبوونی بینایی لە چاوێک یان هەردوو چاو
• بەدوانەبوونی بینایی، واتە ئەو شتانەی سەیریان دەکرێت، دەبن بە دوو لەبەرچاوی کەسەکە. بۆنموونە یەک پەنجە ببێت بە دوو.
• داکەوتنی لایەکی دەموچاو
• بێهێزیی لایەکی جەستە
• لەدەستدانی توانای ئاخاوتن، زمانگرتن یان تێکەڵکردنی وشەکان
• سەرگێژبوون
• رەقبوونی مل
• دڵتێکەڵهاتن و رشانەوە
• لەدەستدانی یەکێک یان زیاتر لە هەستەکان

مەرج نییە ئەم نیشانانە هەموویان لە کەسێکدا دەربکەوون، بوونی چەند نیشانەیەک لەمانە لەوانەیە ئاماژە بێت بۆ روودانی جەڵتەی مێشک.

چی مەترسیی روودانی زیاددەکات؟

جەڵتە، دەکرێت لە هەموو کەسێکدا رووبدات، بەڵام مەترسیی روودانی لە هەندێک کەسدا زیاترە. بۆنموونە ئەو کەسانەی بەرزەفشاری خوێن، بەرزیی چەوریی خوێن، شەکرەی جۆری دوو، مێژووی جەڵتەی دڵ و مێشک و ناڕێکیی کارەبایی دڵیان هەیە.

جۆرەکانی جەڵتە چین؟

دوو جۆری جەڵتە هەن، یەکێکیان بەهۆی گیرانی خوێنبەرەکانەوە روودەدات، یەکێکیان بەهۆی تەقینی خوێنبەرەکانەوە. لە هەردوو جۆرەکەدا خوێن ناڕوات بۆ دەمارەخانەکان. نەبوونی خوێن و ئۆکسجینی پێویست دەبێتەهۆی مردنی ئەم خانانە.

هۆکارەکانی جەڵتە؟

• کۆبوونەوەی چەوری لە خوێنبەرەکاندا
• کێشەی نەمەیینی خوێن
• کێشەی کارەبایی دڵ
• کێشەی زگماکیی دڵ
• بەرزەفشاری خوێن
• گوپکردنی خوێنبەرەکان
• شێرپەنجەی مێشک
• نەخۆشیی خوێنبەرەکان

چارەسەری جەڵتە چییە؟

چەندین رێگەی جیاواز هەن بۆ چارەسەرکردنی جەڵتەی مێشک، بەگوێرەی جۆر و حاڵەتی نەخۆشەکە دەگۆڕێت. هەندێکجار، جەڵتە لەوانەیە پێویستی بە نەشتەرگەری بێت، بۆئەوەی فشاری سەر مێشک کەمبکرێتەوە.

چۆن رێگری لە روودانی جەڵتە بکرێت؟

جەڵتە رێگری لێ ناکرێت، بەڵام کۆمەڵێک هەنگاو هەن دەکرێت بگیرێنەبەر بۆ کەمکردنەوەی مەترسیی توشبوون بە جەڵتە

• جگەرەنەکێشان
• کەمخواردنەوەی کحول
• خەوی پێویست و رێک
• کۆنترۆڵکردنی شەکرە
• کۆنترۆڵکردنی بەرزەفشاری خوێن
• کۆنترۆڵکردنی چەوریی خوێن

ئایا دوای جەڵتە دەکرێت کەسەکە بەیەکجاری چاکببێتەوە؟

ئەمە بەگوێرەی جۆرەکانی جەڵتە و توندییەکەی دەگۆڕێت. دەکرێت هەندێک کەس بەتەواوی چاکببنەوە، هەندێکیش گرفتەکانیان بەردەوام بێت و چاک نەبنەوە.