تورکیا ئاماری هەناردەی 11 مانگی ئەمساڵی بڵاوکردەوە و عێراق و هەرێمی کوردستان لە پلەی یەکەمی وڵاتانی دراوسێی ئەو وڵاتە دێن بۆ هاوردەکردنی کاڵا.

پشکی شێر بەر عێراق و هەرێمی کوردستان کەوتووە

بەگوێرەی ئاماری وەزارەتی بازرگانیی تورکیا، لە ماوەی 11 مانگی ئەمساڵدا کۆی هەناردەی تورکیا بۆ وڵاتانی دراوسێی گەیشتووەتە 25 ملیار و 310 ملیۆن دۆلار.

لەو بڕە، نۆ ملیار و 300 ملیۆن دۆلاری بۆ هەرێمی کوردستان و عێراق بووە، کە بەمەش زۆرترین کاڵا و شمەکیان بۆ هەناردە کراوە.

لەدوای عێراق، وڵاتی بولگاریا بە چوار ملیار و 200 ملیۆن دۆلار لە پلەی دووەم دێت.

کاریگەریی ڕووخانی ئەسەد لەسەر بازرگانی

ئامارەکان دەریدەخەن کە گۆڕانکارییە سیاسییەکان کاریگەرییان لەسەر ئابووری هەبووە؛ بەهۆی ڕووخانی بەشار ئەسەد و دروستبوونی دەسەڵاتی نزیک لە تورکیا لە سووریا، هەناردەی تورکیا بۆ ئەو وڵاتە بەڕێژەی 54.2% بەرزبووەتەوە.

گەشەکردنی هەناردەی تورکیا

بەشێوەیەکی گشتی، تورکیا لەمساڵدا بە بەهای 247 ملیار و 200 ملیۆن دۆلار کاڵای هەناردەی دەرەوە کردووە، کە بەراورد بە هەمان ماوەی ساڵی ڕابردوو 3.7% بەرزبووەتەوە.

زۆرترین ئەو کاڵایانەی هەناردە کراون

وەک لە ئامارەکەدا هاتووە، ئەو کاڵایانەی تورکیا زۆرترین هەناردەی بۆ وڵاتانی دراوسێ هەبووە بریتین لە:

ماددەکانی پاککردنەوە.

دانەوێڵە.

پاقلەمەنی.

کەلوپەلی ناوماڵ.