وەزارەتی دارایی هەرێم: مووچە و ئیمتیازاتی زیندانیانی سیاسی هاوتای عێراق دەکرێت
حکومەتی هەرێمی کوردستان ڕێکارە کردارییەکانی بۆ هاوتاکردنی مووچە و شایستە داراییەکانی زیندانیانی سیاسی و ڕاگیراوان لەگەڵ حکومەتی فیدراڵ دەستپێکرد و بۆ ئەو مەبەستە شاندێکی باڵا سەردانی بەغداد دەکات.
دەستپێکردنی ڕێکارە کردارییەکان
بەگوێرەی ڕاگەیێنراوێکی وەزارەتی دارایی و ئابووریی هەرێمی کوردستان، کۆبوونەوەیەکی باڵا لە دیوانی وەزارەتەکە بەڕێوەچووە بۆ تاوتوێکردنی ڕێکارەکانی هاوتاکردنی مووچەی زیندانیانی سیاسی و ڕاگیراوانی هەرێم لەگەڵ حکومەتی فیدراڵ. ئەم هەنگاوە دوای زنجیرەیەک لێکتێگەیشتنی هاوبەشی نێوان وەزارەتی شەهیدان و ئەنفالکراوان لەگەڵ دەزگای زیندانیانی سیاسی عێراق دێت.
جێبەجێکردنی بڕیاری ئەنجومەنی وەزیران
ئەم پڕۆسەیە لە چوارچێوەی جێبەجێکردنی بڕیاری مانگی 3ی ئەمساڵی ئەنجومەنی وەزیرانی هەرێمی کوردستانە. ئامانج لێی هاوتاکردنی سەرجەم مووچە، ئیمتیازات و شایستە داراییەکانی زیندانیانی سیاسی هەرێمی کوردستانە لەگەڵ ئەو ئیمتیازاتانەی کە هاوتاکانیان لە حکومەتی عێراق وەریدەگرن، بۆ ئەوەی هیچ جیاوازییەک لە نێوان هەردوولادا نەمێنێت.
سەردانی شاندی هەرێم بۆ بەغداد
لە کۆتایی کۆبوونەوەکەدا بڕیاردرا کە لە ئایندەیەکی نزیکدا شاندێکی حکومەتی هەرێمی کوردستان بە مەبەستی تەواوکردنی ڕێکارە کۆتاییەکان و دابینکردنی بودجەی پێویست سەردانی بەغداد بکات. ئەم شاندە کار لەسەر جێگیرکردنی شایستە داراییەکان و دابینکردنی سەرجەم ئەو ئیمتیازاتانە دەکات کە لە چوارچێوەی پڕۆسەی هاوتاکردنەکەدا بڕیاریان لەسەر دراوە.
3 کاتژمێر پێش ئێستا