سەرۆکی هەرێمی کوردستان داوای خێراکردنی هەنگاوەکانی یەکخستنەوەی پێشمەرگە دەکات و ڕایدەگەیەنێت، ململانێکانی ناوچەکە دەرفەتی سستیی پڕۆسەکەیان نەهێشتووە و دەبێت بەغدادیش چەک و پێداویستییان بۆ دابین بکات.

خێراکردنی پڕۆسەی یەکخستنەوەی هێزەکان

نێچیرڤان بارزانی، سەرۆکی هەرێمی کوردستان ڕایگەیاند، هەرچەندە لە یەکگرتنەوەی هێزەکانی پێشمەرگەدا هەنگاوی باش نراوە، بەڵام پێویستە ئەم پڕۆسەیە زۆر خێراتر بکرێت. ئاماژەی بەوەش کرد کە دەبێت ئەو سستییەی لە پڕۆسەکەدا هەیە چارەسەر بکرێت، چونکە ئاڵنگاری و ململانێکانی ئێستای ناوچەکە وا دەخوازن کە ئەم ئەرکە نەک هەر زوو، بەڵکو 1 ڕۆژ زووتر جێبەجێ بکرێت.

گرەنتیی پاراستنی قەوارەی هەرێمی کوردستان

سەرۆکی هەرێم جەختی لەوە کردەوە کە بە ئیرادەیەکی جیددی و بەهێزەوە بەردەوام دەبن لە تێپەڕاندنی ئاستەنگەکان بۆ سەرخستنی پڕۆسەی یەکخستنەوەی هێزەکان، کە بە پڕۆسەیەکی "چارەنووسساز" ناوی برد. نێچیرڤان بارزانی ڕوونیکردەوە کە یەکگرتوویی پێشمەرگە، گرەنتی و بنەمایەکی سەرەکییە بۆ پاراستنی تەواوی مافە دەستوورییەکان و پارێزگاریکردن لە قەوارەی فیدراڵیی هەرێمی کوردستان.

ڕۆڵی وڵاتانی هاوپەیمان لە چاکسازییەکاندا

لە بەشێکی دیکەی وتارەکەیدا، نێچیرڤان بارزانی سوپاس و پێزانینی خۆی و هەرێمی کوردستانی ئاراستەی وڵاتانی دۆست و هاوپەیمان کرد. دەستخۆشی لە هاوکارییەکانیان کرد کە لە پڕۆسەی چاکسازییەکانی وەزارەتی پێشمەرگە و هەوڵەکان بۆ یەکگرتنەوەی هێزەکان پێشکەشیان کردووە و بە فاکتەرێکی گرنگی سەرکەوتنی پڕۆسەکەی ناوبردن.

پابەندییە دەستوورییەکانی بەغداد بەرامبەر پێشمەرگە

سەرۆکی هەرێمی کوردستان داوای لە حکومەتی فیدراڵ کرد ئەرک و پابەندییە یاسایی و دەستوورییەکانی بەرامبەر بە پێشمەرگە جێبەجێ بکات. جەختی کردەوە کە دەبێت بەغداد بە تایبەتی چەک، تەقەمەنی و تەواوی پێداویستییە سەربازییەکان بۆ پێشمەرگە دابین بکات، چونکە بەپێی دەستوور پێشمەرگە پارێزەری ئاشتی و سەقامگیریی تەواوی عێراقە.