پارێزەری دۆسیەی ئەنفالکراوان ئاشکرای دەکات، ناو و پلەی تۆمەتبارێکی نوێی ئەنفال دەستنیشان کراوە و لە داهاتوویەکی نزیکدا دەستگیر دەکرێت؛ هاوکات باس لەو ئاستەنگانە دەکات کە لەبەردەم دۆزینەوەی 423 تۆمەتباری دیکەدان.

ئاشکراکردنی تۆمەتبارێکی نوێ

ئەیاد کاکەیی، پارێزەری دۆسیەی ئەنفالکراوان ڕایگەیاند، ئومێدەوارن لە چەند مانگی داهاتوودا کەسێک دەستگیر بکرێت کە هاوشێوەی "عەجاج" تاوانی دژ بە ئەنفالکراوان ئەنجامداوە. ئاماژەی بەوەش کرد، ناو و پلەی ئەو کەسە لای ئەوان ئاشکرا کراوە، بەڵام بەهۆی نهێنیی پرۆسەکەوە و بۆ سەرکەوتنی دەستگیرکردنەکەی، لە ئێستادا بۆ ڕای گشتی ئاشکرای ناکەن.

بەدواداچوون بۆ 423 تۆمەتبار

وەزارەتی کاروباری شەهیدان و ئەنفالکراوان لە بەدواداچوونەکانی بۆ دەستگیرکردنی تۆمەتبارانی ئەنفال بەردەوامە، کە کۆی گشتییان 423 تۆمەتبارە. کاکەیی ئاشکرای کرد، تەنیا لە دۆسیەی "عەجاج"دا ناوی 8 کەسی دیکە ئاشکرا کراوە کە لە ناو زیندانی "نوگرە سەلمان" تاوانیان بەرامبەر بە کچان و ژنانی کورد ئەنجامداوە.

ئاستەنگەکانی بەردەم دەستگیرکردن

پارێزەری دۆسیەی ئەنفالکراوان ڕوونیکردەوە، گۆڕینی ناو و دەرکردنی پاسپۆرتی نوێ گەورەترین بەربەستن لەبەردەم دۆزینەوەی تۆمەتباران. بە گوتەی ئەو، تۆمەتبارانی بەعس شارەزا بوون و دەیان فێڵ بۆ خۆشاردنەوە بەکاردەهێنن، هەر ئەمەش وایکردووە وەزارەتی ناوخۆ ڕێکارەکانی گۆڕینی ناو قورس بکات تاوەکو ڕێگری لە خۆدزینەوەی ئەو کەسانە بگرێت.

شوێنی تۆمەتباران و ڕێکارە داراییەکان

بەپێی زانیارییەکانی ئەیاد کاکەیی، لە کۆی 423 تۆمەتبارەکە، ڕێژەیەکی باشیان لە ناو هەرێمی کوردستاندان و ئەوانی دیکەش لە وڵاتانی ئوردن، ئیمارات و تورکیان. ئاماژەی بەوەش کرد، عەجاج لە کاتی دادگاییکردنەکەیدا ناوی 8 ئەفسەری پلەبەرزی داوە، لە ئێستاشدا ڕێنمایی دراوە بۆ بلۆککردنی هەژمارە بانکییەکانی سەرجەم تۆمەتباران و قەدەغەکردنی گەشت لێیان تاوەکو ڕاپێچی دادگا دەکرێن.