عێراق نەوتی بەسرە دەباتە کەرکووک بۆ زیادکردنی هەناردەی بۆری جەیهان
پووختەی هەواڵەکە:
- تێچووی گواستنەوە، کارپێکردن و نۆژەنکردنەوەی هەر بەرمیلێک نەوت بۆ تورکیا 1.62 دۆلارە.
- عێراق نەوتی بەسرە بە تانکەر دەباتە کەرکووک بۆ پشتیوانی هەناردەی بۆری جەیهان تاوەکو بگاتە 750 هەزار بەرمیل.
- بەرهەمهێنانی نەوتی هەرێمی کوردستان بەهۆی شەڕەوە دابەزیوە و هەوڵ دەدرێت هەناردەکەی بگەیەنرێتە 200 هەزار بەرمیل.
- داهاتی هەناردەی بەرهەمە نەوتییەکان لە ڕێگەی سووریاوە گەیشتووەتە یەک ملیۆن تۆنی ڕۆژانە و دۆخەکە جێگیرە.
بەڕێوەبەرى كۆمپانیای سۆمۆلە چاوپێکەوتنێکدا لەگەڵ کەناڵى (دیجلە)ـى عێراقى، ڕایگەیاند کە حکومەتی عێراق پلانی هەیە گواستنەوەی خاوی بەسرە بەرەو کۆگاکانی کەرکووک دەستپێبکات تاوەکو بۆریی نەوتی جەیهان بە چڕی کار بکاتەوە. ئەم هەنگاوە دوای پەککەوتنی گەرووی هوورمز دێت و ئامانج لێی گەیاندنی ئاستی هەناردەی ڕۆژانەیە بۆ 750 هەزار بەرمیل لە ڕێگەی تورکیاوە. هاوکات، گفتوگۆ لەگەڵ کۆمپانیا بیانییەکانی هەرێم دەستپێکردووە بۆ ئەوەی بەرهەمهێنان لە کێڵگەکان زیاد بکەن و قەرەبووی ئەو دابەزینە بکەنەوە کە بەهۆی شەڕەوە دروستبووە.
کۆمپانیای سۆمۆ (بەڕێوەبەری کۆمپانیا):
- تێچووی گواستنەوەی هەر بەرمیلێک نەوت بۆ تورکیا 1.62 دۆلارە و کرێی کۆگاکردن و نۆژەنکردنەوەش لەخۆ دەگرێت.
- عێراق ڕۆژانە یەک ملیۆن بەرمیل نەوت بەبێ هیچ داشکاندنێک لە نرخەکەیدا بە وڵاتی تورکیا دەفرۆشێت.
- بۆری جەیهان توانای هەناردەکردنی یەک ملیۆن و 500 هەزار بەرمیل نەوتی لە ڕۆژێکدا هەیە.
- بەرهەمهێنانی نەوتی هەرێمی کوردستان لە 230 هەزارەوە بۆ 20 هەزار بەرمیل دابەزیوە بەهۆی بەئامانجگرتنی کێڵگەکان.
- تێکڕای نرخی فرۆشتنی هەر بەرمیلێک نەوتی عێراق لە مانگی تەممووزدا 60 دۆلار بووە.
جیاوازی نرخەکان لە گرێبەستی پێشوو و ئێستادا:
بەرپرسێکی کۆمپانیای نەوتی باکوور ئاشکرای کرد کە داتاکانی هەناردە ڕۆژانە گۆڕانکارییان بەسەردا دێت؛ لە 2ی ئابدا 110 هەزار بەرمیل و لە 3ی ئابدا 100 هەزار بەرمیل نەوت لە ڕێگەی بۆریی هەرێمەوە هەناردە کراوە. وەزارەتی نەوت گرێبەستی لەگەڵ چەند کۆمپانیایەک کردووە بۆ گواستنەوەی نەوتی بەسرە بە تانکەر بۆ کەرکووک تاوەکو پاڵپشتی هەناردەی جەیهان بکات. لە ئێستادا گفتوگۆ لەگەڵ هەرێمی کوردستان بەردەوامە بۆ ئەوەی هەناردەی کێڵگەکان لەم مانگەدا بۆ 200 هەزار بەرمیل زیاد بکرێت، بەڵام پێشبینی دەکرێت لە قۆناغی یەکەمدا بگاتە 150 هەزار بەرمیل. کرێی گواستنەوەی ئێستا کە 1.62 دۆلارە بۆ وڵاتی تورکیا، جیاوازە لە نرخەکانی پێشوو کە بۆ حکومەتی فیدراڵ 1.18 دۆلار و بۆ هەرێمی کوردستان نزیکەی 4.31 دۆلار بووە بۆ لایەنی تورکیا.
زانیاری زیاتر بۆ تۆ
