پووختەی هەواڵەکە:

• بافڵ تاڵەبانی بە هاوڕێیەتیی شاندێکی باڵای حزبی و ئەمنی سەردانی تارانی کرد.

• سەرۆکی یەکێتی لەگەڵ مەسعود پزیشکیان، محەممەد باقر قالیباف و عەباس عێراقچی کۆدەبێتەوە.

• تاوتوێکردنی گرژییەکانی نێوان واشنتن و تاران تەوەرێکی سەرەکیی دیداری شاندەکەیە.

• سەرۆکی یەکێتی جەخت لە نەبوونی هەرێمی کوردستان بە مەیدانی جەنگ دەکاتەوە.

---

زانیارییەک کە بە کەناڵ8 گەیشتووە ئاشکرای دەکات، سەردانەکەی بافڵ تاڵەبانی بۆ تاران بە هاوڕێیەتیی بەرپرسانی باڵای سیاسی و ئەمنیی یەکێتی بەڕێوەدەچێت، ئامانج لێی گەیاندنی پەیامێکی ڕوونە بۆ سەرکردایەتیی ئێران لەبارەی پاراستنی سەقامگیریی ناوچەکە و دوورخستنەوەی هەرێمی کوردستان لە لێکەوتەی ململانێکانی نێوان واشنتن و تاران.

---

پێکهاتەی شاندەکە و هەڵوێستەکانی بافڵ تاڵەبانی:

• شاندە یاوەرەکەی سەرۆکی یەکێتی پێکدێت لە: دەرباز کۆسرەت ڕەسوڵ، عیماد ئەحمەد، هاوڕێ شێخ دارۆ، ئەحمەد حەمە کەریم ئەندامانی مەکتەبی سیاسی و جەلال شێخ ناجی، سەرۆکی دەزگای زانیاری.

• هەرێمی کوردستان نابێت ببێتە گۆڕەپانی جەنگ، بەڵکو دەبێت وەک پردێک بۆ نێوەندگیری و دیالۆگی نێوان لایەنە ناکۆکەکان بمێنێتەوە.

• جەختکردنەوە لەوەی هەرێمی کوردستان نابێتە هەڕەشە بۆ سەر ئاسایشی کۆماری ئیسلامیی ئێران و وڵاتانی ناوچەکە.

• هۆشداریدان لەوەی کە بەشداریکردنی کورد وەک سەری ڕم لە کێشە و ململانێ ئیقلیمییەکاندا کارەساتی بەدوادا دێت.

• کۆماری ئیسلامیی ئێران نابێت وەک سەرچاوەی هەڕەشە بۆ سەر ئاسایشی ناوچەکە هەژمار بکرێت.

کۆماری ئیسلامیی ئێران:

کۆماری ئیسلامیی ئێران لەسەر ئاستی وەزارەتی دەرەوە و لە ڕێگەی عەباس عێراقچییەوە بانگێشتی فەرمیی شاندەکەی یەکێتیی کردووە. لە میانی دیدارەکاندا، مەسعود پزیشکیان سەرۆککۆمار، محەممەد باقر قالیباف سەرۆکی پەرلەمان و عەباس عێراقچی وەزیری دەرەوە، لەگەڵ شاندەکەی سلێمانی دۆسیەی ئاسایشی سنوورەکان، ڕێککەوتننامە ئەمنییەکان و هاوسەنگییەکانی ناوچەکە لە بەرامبەر واشنتن تاوتوێ دەکەن.

زانیاری زیاتر بۆ تۆ

قوباد تاڵەبانى و کاربەڕێکەرى باڵیۆزخانەی ئەمریکا لە عێراق کۆبوونەوە