پووختەی هەواڵەکە

• بەهای دیناری عێراقی بەرامبەر دۆلاری ئەمریکی بەردەوامە لە دابەزین و لە ماوەی کەمتر لە سێ هەفتەدا، نرخی 100 دۆلار لە 155 هەزار دینارەوە نزیکبووەتەوە لە 160 هەزار دینار.

• جیاوازیی نێوان نرخی فەرمیی بانکی ناوەندی و بازاڕەکانی ئاڵوگۆڕی دراو لە عێراق و هەرێمی کوردستان فراوانتر بووە و گەیشتووەتە نزیکەی 20%، کە دەکاتە 27 هەزار دینار بۆ هەر 100 دۆلارێک.

• شارەزایانی ئابووری هۆکاری ناجێگیرییەکە بۆ پڕوپاگەندە و خواستی بازرگانان دەگەڕێننەوە، هاوکات چاوەڕوان دەکرێت سەردانی سەرۆکوەزیرانی عێراق بۆ واشنتن و کۆبوونەوەی لەگەڵ سەرۆکی ئەمریکا بەهای دینار بەهێز بکات.

---

بەگوێرەی زانیارییەک، کە بە کەناڵ8 گەیشتووە، کەیفی خۆشناو، گوتەبێژی بازاڕی دراو لە هەولێر گوتی، دۆلار بەپێی پێویست لە بازاڕەکاندا بوونی هەیە، بەڵام بەهۆی زیادبوونی خواستی بازرگانان بۆ حەواڵەکردن، نرخی 100 دۆلار گەیشتووەتە 159 هەزار و 250 دینار.

---

ئامارەکانی دابەزینی بەهای دینار بەرامبەر دۆلار

• لە سەرەتای مانگی ئەیلوولدا نرخی 100 دۆلار 155 هەزار دینار بووە، لە هەفتەی دووەمدا بووەتە 156 هەزار و 750 دینار و پاش 19 ڕۆژ گەیشتووەتە 159 هەزار دینار.

• لە ماوەی کەمتر لە سێ هەفتەدا، دراوی عێراقی بۆ هەر 100 دۆلارێک بڕی چوار هەزار دینار لە بەهاکەی بەرامبەر دۆلار لەدەستداوە.

• جیاوازیی نێوان نرخی فەرمیی بانکی ناوەندیی عێراق کە 132 هەزار دینارە لەگەڵ نرخی بازاڕ، بۆ هەر 100 دۆلارێک گەیشتووەتە 27 هەزار دینار.

• قەبارەی مامەڵەی ڕۆژانە تەنیا لە بازاڕی شاری هەولێر لە نێوان 15 بۆ 20 ملیۆن دۆلاردایە، لە پارێزگاکانی سلێمانی و دهۆکیش بەهەمان بڕ یاخود کەمێک کەمتر ئاڵوگۆڕی پێوە دەکرێت.

هۆکارەکانی شێوانی بازاڕ و چارەسەری کێشەی دراو

نەبیل مەرسومی، شارەزای ئابووریی عێراق ئاماژەی بەوە کردووە کە لەگەڵ نزیکبوونەوەی وادەی کۆکردنەوەی چەک لە دەستی دەوڵەت و بڵاوبوونەوەی پڕوپاگەندەی زۆر، بازاڕەکان شێواویان پێوە دیارە و چاوەکان لەسەر گەیشتنی فڕۆکەی دۆلاری کاشن بۆ بانکی ناوەندی. هاوکات کەیفی خۆشناو ڕوونکردنەوەی داوە کە زۆرینەی ئەوانەی دۆلار لە بازاڕ دەکڕن بازرگانانن، ئەگەر حکومەت بە نرخی فەرمی دۆلاریان پێبدات خواست کەمدەبێتەوە و دینار بەرزدەبێتەوە، هاوکات جەختی لەوەش کردووەتەوە کە دەبێت هەمووان پاڵپشتی لە بەهای دینار بکەن، چونکە فەرمانبەران و خانەنشینان مووچەکانیان بە دۆلارە و زەرەرمەندی یەکەمی دابەزینەکەن.

زانیاریی زیاتر لەسەر بابەتەکە

بڕیارە عەلی زەیدی، سەرۆکوەزیرانی عێراق سەردانی واشنتن بکات و لە نێوان 22 تاوەکو 28ـی ئەیلوول بەشداری لە کۆبوونەوەی لوتکەی خولی 81ـەمینی کۆمەڵەی گشتیی نەتەوە یەکگرتووەکاندا بکات و وتاری عێراق پێشکەش بکات. لە چوارچێوەی سەردانەکەدا بڕیارە لەگەڵ دۆناڵد ترەمپ، سەرۆکی ئەمریکا کۆببێتەوە؛ بەهۆی ئەوەی سەرۆکی ئەمریکا پاڵپشتی لە کابینەکەی دەکات و چەندین گرێبەستیش لە بواری وزەدا لە نێوان هەردوو وڵات واژۆ کراون، پێشبینی دەکرێت ئەم سەردان و دیدارە لە ڕۆژانی داهاتوودا ببێتە هۆی بەهێزکردنی بەهای دینار.

زانیاریی زیاتر بۆ تۆ

بەهای 100 دۆلار گەیشتە 158 هەزار دینار

بەهاى دینار لە هەشت مانگى ڕابردوو بەرامبەر دۆلار ناجێگیر بووە