پووختەی هەواڵەکە:

• دیبەیتی گشتیی 81ـەمین خولی کۆمەڵەی گشتیی نەتەوە یەکگرتووەکان لە نیویۆرک دەستیپێکرد.

• سەرکردەی 130 وڵات و نوێنەری 193 دەوڵەتی ئەندام لە لوتکەکەدا بەشدارن.

• جەنگەکانی ڕۆژهەڵاتی ناوەڕاست و ئۆکرانیا لەگەڵ پرسی ژیریی دەستکرد لە سەرەوەی تەوەرەکانن.

• لە پەراوێزی لوتکەکەدا هەوڵە دیپلۆماسییەکان بۆ دیاریکردنی سکرتێری گشتیی داهاتوو دەستیپێکردووە.

---

لە دەستپێکی دیبەیتی گشتیی لوتکەی نەتەوە یەکگرتووەکان لە نیویۆرک، 130 سەرکردەی وڵاتانی جیهان بۆ تاوتوێکردنی ئاڵۆزییە سەربازییەکان و قەیرانە نێودەوڵەتییەکان کۆبوونەتەوە. ئەم خولەی لوتکەکە لە سایەی قووڵبوونەوەی جەنگەکانی ڕۆژهەڵاتی ناوەڕاست و ئۆکرانیا بەڕێوەدەچێت، هاوکات دۆسیەی دانانی ژنێک وەک سکرتێری گشتیی داهاتووی ڕێکخراوەکە بووەتە تەوەری دانوستانە نهێنییەکان.

---

تەوەرە فەرمییەکانی دیبەیتی گشتی:

• سەرۆکایەتیکردنی 81ـەمین خولی کۆمەڵەی گشتی لەلایەن خەلیل ڕەحمان وەزیری دەرەوەی بەنگلادیش بە بەشداریی نوێنەری 193 دەوڵەت.

• تاوتوێکردنی جەنگ و قەیرانە سەربازییەکان لەوانە دۆسیەی ئێران، غەززە، لوبنان، جەنگی ڕووسیا و ئۆکرانیا لەپاڵ قەیرانی مرۆیی سوودان.

• خستنەڕووی مەترسییەکانی گۆڕانی کەشوهەوا، بەرزبوونەوەی ئاستی ئاوی دەریاکان و پرسی دادپەروەری لە گواستنەوەی وزەدا.

• تاوتوێکردنی هۆشدارییەکانی پەیوەست بە مەترسییەکانی گەشەسەندنی ژیریی دەستکرد لەسەر کۆمەڵگەی مرۆڤایەتی.

• لێکۆڵینەوە لە هۆکارەکانی خاوبوونەوەی هەنگاوە ئابوورییەکان و ئامانجەکانی پلانی گەشەپێدانی بەردەوام بۆ ساڵی 2030.

دانوستانە دیپلۆماسییەکان بۆ پۆستی سکرتێری گشتی:

لە پەراوێزی کۆبوونەوە فەرمییەکاندا، هەوڵێکی چڕی دیپلۆماسی لە پشت پەردەوە لەنێوان شاندی وڵاتاندا دەستیپێکردووە بۆ تاوتوێکردنی بەربژێرە ئەگەرییەکانی پۆستی سکرتێری گشتیی نەتەوە یەکگرتووەکان؛ بە لەبەرچاوگرتنی نزیکبوونەوە لە کۆتاییهاتنی ماوەی یاسایی ئەنتۆنیۆ گوتێرێس، پاڵپشتییەکی بەرفراوانی نێودەوڵەتی دروستبووە تاوەکو بۆ یەکەمجار لە مێژووی ئەو ڕێکخراوە جیهانییەدا ژنێک بۆ پۆستی سکرتێری گشتی هەڵبژێردرێت.

زانیاری لەسەر بابەتەکە:

کۆبوونەوەکانی ئەم لوتکەیە لە 18ـی ئەیلوول لەژێر دروشمی "گەڕانەوەی متمانە و بەڕێوەبردنی گۆڕانکارییەکان، نەتەوە یەکگرتووەکان بۆ خزمەتی گشتی" دەستیپێکردووە و لە 28ـی ئەیلوول کۆتایی دێت، کە تێیدا جیا لە پێشکەشکردنی وتاری سەرکردەکان، چەندین کۆبوونەوەی دووقۆڵی بە مەبەستی هێورکردنەوەی پێکدادانە هەرێمییەکان ئەنجام دەدرێن.

زانیاری زیاتر بۆ تۆ:

عەلی زەیدی بۆ کۆبوونەوەی نەتەوە یەکگرتووەکان بەڕێکەوت بەرەو نیویۆرک