وادەی دابەشکردنی نەوتی سپی نادیارە و بەرمیلێک بە 275 هەزارە
پووختەی هەواڵەکە:
- وەزارەتی سامانە سروشتییەکان تاوەکو ئێستا هیچ وادەیەکی بۆ دابەشکردنی نەوتی سپی دیارینەکردووە.
- نرخی بەرمیلێک نەوتی سپی لە بازاڕدا بۆ 275 هەزار دینار بەرزبووەتەوە.
- هەرێمی کوردستان ساڵانە پێویستی بە زیاتر لە 254 ملیۆن لیتر نەوتی سپییە.
- بەڕێوەبەرایەتییەکانی نەوت و کانزاکان بۆ دابینکردنی نەوتەکە چاوەڕێی ڕێکارەکانی بەغداد دەکەن.
لەگەڵ نزیکبوونەوەی وەرزی سەرما هیچ وادەیەک بۆ دابەشکردنی نەوتی سپی بەسەر ماڵاندا لە هەرێمی کوردستان دیارینەکراوە و وەزارەتی سامانە سروشتییەکان چاوەڕێی بەغداد دەکات. ئەم دواکەوتنە لە کاتێکدایە کە بازاڕی ئازاد تووشی کەمیی نەوت بووە و نرخی هەر لیترێک گەیشتووەتە 1250 دینار، ئەمەش باری دارایی هاووڵاتیانی لە ناوچە شاخاوییەکان قورستر کردووە.
وتەی بەڕێوەبەرایەتییەکانی نەوت و کانزاکانی سلێمانی و هەولێر بۆ کەناڵ8:
- سەلام عومەر عەلی، گوتەبێژی بەڕێوەبەرایەتیی نەوت و کانزاکانی سلێمانی ڕایگەیاند وەزارەت بڕ و نرخ دیاری دەکات، بەڵام تاوەکو ئێستا هیچ بڕیارێکی نوێ نییە و وادەی دابەشکردنی نەوت نادیارە.
- گوتەبێژەکەی نەوتی سلێمانی ئاماژەی بەوە کرد لە کاتی دەستپێکردنەوەدا لە مەڵبەندەکانی 8 و 9ـەوە دەستپێدەکەن کە ساڵی ڕابردوو دابەشکردنی نەوت تێیاندا ڕاوەستابوو.
- سەرچاوەیەک لە لێژنەی دابەشکردنی بەڕێوەبەرایەتیی نەوت و کانزاکانی هەولێر ڕایگەیاند چاوەڕێی هەوڵی لێژنەکانی وەزارەتن بۆ دابینکردنی نەوتی سپی لە بەغدادەوە.
- هەمان سەرچاوە لە هەولێر ئاشکرای کرد تەنانەت لە بازاڕیشدا نەوت کەمە، لە کاتێکدا ساڵانی ڕابردوو حکومەت نەوتی لە بازاڕ دەکڕی و بە نرخی پاڵپشتیکراو دابەشی دەکرد.
پێداویستیی پارێزگاکان، ڕێژەی دابەشکردن و نرخی بازاڕ:
لە لایەکی دیکەوە، ئامارە فەرمییەکان قەبارەی بەرزی پێداویستیی ساڵانە لە شارەکانی هەرێمی کوردستان دەردەخەن؛ کۆی گشتیی پێویستیی ناوخۆ زیاتر لە 254 ملیۆن لیترە، کە بۆ پارێزگاکانی سلێمانی و هەڵەبجە 110 ملیۆن لیترە بۆ ئەوەی بەشەخۆراکی 200 لیتری بگاتە ماڵان. هاوکات پارێزگای هەولێر پێویستی بە زیاتر لە 123 ملیۆن لیترە و دانیشتووانی ناوچە شاخاوییەکانیش ساڵانە پێویستیان بە 7 بۆ 8 بەرمیلە. لە دهۆک و زاخۆش پێویستی بە 74 ملیۆن لیترە، کە ساڵی ڕابردوو لە کۆی 370 هەزار خێزان لەناو شاردا تەنها 40% بۆ 45%، و لە شاخەکانیش 65% بۆ 70% نەوتیان پێدراوە، لە کاتێکدا ئێستا لە بازاڕی ئازاد بەرمیلێک بە 275 هەزار دینار دەفرۆشرێت.
لە ساڵانی ڕابردوودا وەزارەتی سامانە سروشتییەکان لە کۆتاییەکانی مانگی ئەیلوول و سەرەتای مانگی تشرینی یەکەم دەستی بە دابەشکردن دەکرد؛ سەرەتا لە ناوچە شاخاوییەکان، دواتر لە دەوروبەری شارەکان و لە قۆناغی کۆتاییشدا لەناو سەنتەری شارەکاندا نەوت دەگەیشتە هاووڵاتیان.
پەیوەستبوونی پڕۆسەی دابینکردنی نەوتی سپی بە حکومەتی بەغدادەوە لە کاتێکدایە کە پاڵاوگە ناوخۆییەکانی هەرێمی کوردستان بەبێ وەرگرتنی نەوتی خاو لە وەزارەتی نەوتی فیدراڵ توانای دابینکردنی تەواوی پێداویستییەکانیان نییە، ئەمەش مەترسیی بێبەشبوونی بەشێکی زۆری ماڵان لە سووتەمەنی لەگەڵ دەستپێکردنی وەرزی سەرما دروستکردووە.
زانیاری زیاتر بۆ تۆ:
2 کاتژمێر پێش ئێستا